దుబాయ్ వేదికగా మరో రసవత్త పోరుకు రంగం సిద్ధమైంది. పది మ్యాచుల్లో ఆరింటిలో ఓడి పాయింట్ల పట్టికలో ఐదు, ఆరు స్థానాల్లో ఉన్న హైదరాబాద్, పంజాబ్ జట్లు అమీతుమీ తేల్చుకోనున్నాయి. ఈ పోరులో గెలిచి తమ స్థానాన్ని మెరుగుపరుచుకోవాలని గట్టి పట్టుదలతో ఉన్నాయి. ఈ సందర్భంగా ఇరుజట్ల బలాలు, బలహీనతలపై ఓ లుక్కేద్దాం.
జోరును కొనసాగిస్తుందా?
లీగ్ను ఓటములతో ప్రారంభించినా.. ప్రస్తుతం హ్యాట్రిక్ విజయాలతో దూసుకెళ్తోంది పంజాబ్. బ్యాటింగ్ విభాగం కెప్టెన్ కేఎల్ రాహుల్, మయాంక్ అగర్వాల్, క్రిస్ గేల్, నికోలస్ పూరన్తో బలంగా ఉంది. ఇటీవలే జట్టులోకి తిరిగొచ్చిన గేల్.. గత రెండు మ్యాచుల్లో అద్భుతంగా ఆడాడు. దీంతో ఓపెనర్లు రాహుల్, మయాంక్లపై కొంత భారం తగ్గింది. జిమ్మీ నీషమ్ జట్టులోకి చేరడం వల్ల బ్యాటింగ్తో పాటు బౌలింగ్లో సమతుల్యం ఏర్పడింది. బౌలర్లు బాగానే రాణిస్తున్నారు. అయితే పంజాబ్.. ప్లేఆఫ్ ఆశల్ని సజీవం చేసుకోవాలంటే ఇకపై ఆడే ప్రతి మ్యాచ్లోనూ గెలవాల్సి ఉంటుంది. కాబట్టి సన్రైజర్స్తో మ్యాచును ఎలాగైనా గెలవాలనే కసితో బరితో దిగుతోంది. మరి ఏం చేస్తుందో చూడాలి.
ఎలా ఆడుతుందో?
వరుస పరాజయాలతో సతమవుతున్న హైదరాబాద్.. ఎట్టకేలకు రాజస్థాన్పై విజయం సాధించింది. సారథి వార్నర్, బెయిర్ స్టో, మనీశ్ పాండే, విజయ్ శంకర్ మంచి ఫామ్లో ఉన్నారు. ఆల్రౌండర్ హోల్డర్ కూడా రాణిస్తున్నాడు. బౌలర్లలో అబ్దుల్ సమాద్, యార్కర్ స్పెషలిస్ట్ టి.నటరాజన్ తమ ప్రదర్శనను కొంచెం మెరుగుపరుచుకుంటే జట్టుకు తిరుగుండదు. సన్రైజర్స్ కూడా ప్లేఆఫ్స్కు అర్హత సాధించాలంటే ఆడే ప్రతి మ్యాచ్లోనూ గెలవడం ఎంతో కీలకం.
జట్లు (అంచనా)
హైదరాబాద్ : డేవిడ్ వార్నర్ (కెప్టెన్), బెయిర్స్టో, విలియమ్సన్, మనీశ్ పాండే, ప్రియమ్ గార్గ్, విజయ్ శంకర్, అబ్దుల్ సమద్, రషీద్ ఖాన్, ఖలీల్ అహ్మద్, సందీప్ శర్మ, నటరాజన్
పంజాబ్ : కేఎల్ రాహుల్(సారథి), మయాంక్ అగర్వాల్, క్రిస్ గేల్, నికోలస్ పూరన్, గ్లెన్ మాక్స్వెల్ దీపక్ హోడా, జేమ్స్ నీషమ్, మురుగన్ అశ్విన్, మహ్మద్ షమీ, రవి బిష్ణోయ్, అర్ష్దీప్ సింగ్
