టీమిండియా మాజీ క్రికెటర్ వీరేంద్ర సెహ్వాగ్.. మహేంద్ర సింగ్ ధోనీపై ప్రశంసలు కురిపించాడు. మహీ కెప్టెన్సీలో భారత్కు అన్ని రంగాల్లో బలంగా ఉండేదని అభిప్రాయపడ్డాడు. ఇటీవల కేఎల్ రాహుల్ అయిదో స్థానంలో ఆడాడు. ఈ విషయంపైనా మాట్లాడాడు ఈ స్టార్ క్రికెటర్.
"ఐదో స్థానంలో ఆడిన కేఎల్ రాహుల్ 4 సార్లు విఫలమైతే.. ప్రస్తుతం ఉన్న టీమిండియా యాజమాన్యం వెంటనే అతడి స్థానాన్ని మార్చేందుకు ప్రయత్నిస్తుంది. అదే ధోనీ కెప్టెన్సీలో ఆ పరిస్థితి ఉండేది కాదు. మరిన్ని అవకాశాలు ఇచ్చేవాడు. కష్టసమయంలో మహీ.. జట్టు సభ్యుల కు మద్దతుగా నిలిచేవాడు"
-- సెహ్వాగ్, టీమిండియా మాజీ క్రికెటర్
ఒకరికి ఓ స్థానం కేటాయిస్తే.. అందులో ఆకట్టుకున్నా, కాస్త నిరాశపర్చినా అవకాశాలు వస్తుండేవని అన్నాడు సెహ్వాగ్. ధోనీ సారథ్యంలో తుదిజట్టు కూర్పుపై స్పష్టమైన అవగాహన ఉండేదని అభిప్రాయపడ్డాడు.
"ధోనీ కెప్టెన్గా ఉన్న సమయంలో ప్రతి అంశంలోనూ పక్కా క్లారిటీ ఉండేది. ఎవరు ఏ స్థానంలో బ్యాటింగ్ చేయాలి అనేది ముందుగానే నిర్ణయించేవారు. ప్రతిభ ఉన్న క్రికెటర్లపై మహీ ఎప్పుడూ కన్నేసి ఉంచేవాడు. భారత క్రికెట్ను ముందుకు తీసుకెళ్తారని భావిస్తే, వారిపై ధోనీ ఎక్కువగా దృష్టిపెట్టేవాడు"
-- సెహ్వాగ్, టీమిండియా మాజీ క్రికెటర్
ధోనీ కెప్టెన్గా ఉన్నప్పుడు వన్డేల్లో టాపార్డర్ బ్యాట్స్మన్ మరింతగా రాణించారని చెప్పిన సెహ్వాగ్... మిడిలార్డర్ ఆటగాళ్లకు అతడి బ్యాటింగ్ మద్దతుగా ఉండేదని గుర్తుచేసుకున్నాడు.
"ఆటగాళ్లకు సమయం ఇవ్వకపోతే తప్పులను ఎలా సరిదిద్దుకుంటారు. ఓపెనింగ్కు మారకముందు నేను తొలుత మిడిలార్డర్లో ఆడాను. చాలా తప్పిదాలు చేశాను. ఫలితంగా చాలా మ్యాచ్లు ఓడిపోయాం. బాగా ఆడగలిగే సత్తా ఉన్నోడిని బెంచ్లో కూర్చోపెట్టకూడదు. వారికి కాస్త సమయమివ్వాలి"
-- సెహ్వాగ్, టీమిండియా మాజీ క్రికెటర్
ఈ మధ్య కాలంలో భారత్.. యువ క్రికెటర్లను ఎక్కువగా పరీక్షిస్తోంది. పంత్, సైనీ, శ్రేయస్, శార్దూల్ వంటి ఆటగాళ్లను భవిష్యత్తు తారలుగా మల్చుకుంటోంది. సంజూ శాంసన్ విషయంలో మాత్రం తగిన న్యాయం చేయడం లేదనే వ్యాఖ్యలు వినిపిస్తున్నాయి.
