వెస్టిండీస్తో తాడోపేడో తేల్చుకునేందుకు భారత జట్టు మరో సిరీస్కు రెడీ అవుతోంది. ఇటీవల జరిగిన పొట్టి ఫార్మాట్ మ్యాచ్ల్లో కోహ్లీసేన.. 2-1 తేడాతో విజేతగా నిలిచింది. తొలి రెండు మ్యాచ్ల్లో నువ్వా, నేనా అనే రీతిలో తలపడినా.. నిర్ణయాత్మక మూడో మ్యాచ్‌లో టీమిండియా సంపూర్ణ ఆధిపత్యం చెలాయించింది. అయితే వన్డే ప్రపంచకప్‌ తర్వాత విండీస్ పర్యటనకు వెళ్లిన భారత్.. ఆతిథ్య జట్టును వాళ్ల దేశంలోనే వైట్‌వాష్‌ చేసింది. మరి దానికి కరీబియన్లు బదులిస్తారో... లేదంటే టీమిండియా చేతిలో చిత్తవుతారో త్వరలో తేలనుంది.
మూడు మ్యాచ్ల వన్డే సిరీస్లో భాగంగా నేడు తొలి మ్యాచ్ చెన్నైలో జరగనుంది. కోహ్లీసేన మరోసారి ఫేవరెట్గా బరిలోకి దిగుతుండగా.. విండీస్ జట్టు టీ20 పరాభవానికి ప్రతీకారం తీర్చుకోవాలని చూస్తోంది.
టాపార్డర్ ఫుల్ ఫామ్.. మయాంక్ చోటే అనుమానం
విండీస్‌తో టీ20 సిరీస్ గెలుపొందిన టీమిండియా... ప్రస్తుతం ఫుల్ జోష్‌లో ఉంది. టాపార్డర్‌లో రోహిత్, రాహుల్, కోహ్లీ అద్భుత ఫామ్‌లో ఉన్నారు. సీనియర్‌ ఓపెనర్‌ శిఖర్‌ ధావన్‌ మోకాలి గాయం నుంచి కోలుకోకపోవడం వల్ల అతడి స్థానంలో మయాంక్ అగర్వాల్‌ను ఎంపిక చేశారు సెలక్టర్లు. అయితే ఇతడి వన్డే అరంగేట్రంపై సందేహం నెలకొంది. ఇందుకు కారణం ధావన్‌ లేని లోటును రాహుల్ భర్తీ చేస్తుండటమే.
ఒకవేళ రాహుల్‌ను మిడిలార్డర్‌లో పంపిస్తే మయాంక్ అగర్వాల్‌ వన్డే అరంగేట్రం చేసే అవకాశముంది. లేదంటే డగౌట్లో కూర్చోవాల్సిందే. వన్‌డౌన్‌లో కెప్టెన్ విరాట్ కోహ్లీ అద్భుత ఫామ్‌లో ఉన్నాడు. ఇక నాలుగో స్థానంలో శ్రేయస్ అయ్యర్ రాణిస్తుండడం వల్ల అతడినే ఆడిస్తారనే నమ్మకం ఉంది.
పంత్కు మరింత కీలకం...
ధోనీ వారసుడిగా పేరు తెచ్చుకున్న యువ బ్యాట్స్‌మన్‌, కీపర్ రిషభ్‌పంత్‌ అటు బ్యాటింగ్‌లో, ఇటు కీపింగ్‌లో విఫలమౌతున్నాడు. జట్టు యాజమాన్యం ఎన్ని అవకాశాలు ఇచ్చినా పేలవ షాట్లతో వికెట్‌ సమర్పించుకుంటూ తీవ్ర విమర్శలు ఎదుర్కొంటున్నాడు. ఈ నేపథ్యంలో అతడికి తొలి వన్డే మరో పరీక్షగా మారింది.
బౌలింగ్‌ విషయంలో వన్డే ప్రపంచకప్‌లో మెరిసిన చాహల్, కుల్దీప్ యాదవ్ చాలా రోజుల తర్వాత జట్టులోకి వచ్చారు. చెన్నై పిచ్‌ స్లో బౌలర్లకు అనుకూలం కాబట్టి వీరిద్దరు ఎలా రాణిస్తారనేది ఆసక్తిగా మారింది. పేస్‌ బౌలింగ్‌లో మహ్మద్ షమి, దీపక్ చాహర్ తమ నైపుణ్యాలకు పదును పెట్టాల్సిన అవసరం ఉంది.
టీ20ల్లో రాణించినా వన్డేల్లో తేలిపోతారు
కరీబియన్‌ బ్యాట్స్‌మన్‌ పొట్టి క్రికెట్‌లో రాణించినంతగా వన్డేల్లో ఆడలేరు. క్రీజులో అడుగుపెట్టినప్పటి నుంచే ఎడాపెడా బౌండరీలతో విరుచుకుపడే బ్యాట్స్‌మెన్‌... వన్డేల్లో నిదానంగా ఆడాల్సిన అవసరం ఉంది. వికెట్‌ కాపాడుకొని స్ట్రైక్‌ రొటేట్‌ చేయాల్సి ఉంటుంది. ఓపెనర్‌ ఎవిన్ లూయిస్ మూడో టీ20లో గాయపడినా నేటి మ్యాచ్‌లో ఆడే అవకాశం ఉంది. హెట్మెయిర్, నికోలస్ పూరన్‌లు పొట్టి సిరీస్లో ఆకట్టుకున్నారు. ఇప్పుడు వన్డేల్లో రాణించాల్సిన అవసరం ఉంది.
సారథి పొలార్డ్ కీలకం...
ఆల్‌రౌండర్‌ రోస్టన్ ఛేజ్ తుదిజట్టులో చోటు దక్కించుకుంటాడని తెలుస్తోంది. అతడి రాకతో విండీస్ బ్యాటింగ్‌ లైనప్‌ మరింత బలంగా మారుతుంది. ధనాధన్‌ ఇన్నింగ్స్‌ ఆడే కెప్టెన్ కీరన్ పొలార్డ్ ఇప్పుడు ముందుండి నడిపించాలి. డెత్‌ ఓవర్లలో భారీ షాట్లతో అలరించే పొలార్డ్ ఎలా రాణిస్తాడనేది చూడాలి. బౌలింగ్‌ విభాగంలో షెల్డన్ కాట్రెల్, జేసన్‌ హోల్డర్, హేడెన్‌ వాల్ష్, విలియమ్స్‌ రాణించాల్సి ఉంటుంది.
15 మందితో జట్లు ఇవే..
- భారత జట్టు:
రోహిత్ శర్మ, కేఎల్ రాహుల్, విరాట్ కోహ్లీ(కెప్టెన్), శ్రేయస్ అయ్యర్, రిషబ్ పంత్(కీపర్), కేదార్ జాదవ్, రవీంద్ర జడేజా, దీపక్ చాహర్, కుల్దీప్ యాదవ్, యజువేంద్ర చాహల్, మహ్మద్ షమి
- వెస్టిండీస్ జట్టు:
ఎవిన్ లూయిస్/బ్రాండన్ కింగ్, షై హోప్, షిమ్రన్ హెట్మెయిర్, రోస్టన్ ఛేజ్, నికోలస్ పూరన్(కీపర్), కీరన్ పొలార్డ్(కెప్టెన్), జేసన హోల్డర్, షెల్డన్ కాట్రెల్, రొమారియో షెఫర్డ్, హెడెన్ వాల్ష్, అల్జారీ జోసెఫ్
