లాక్డౌన్తో ఇంట్లోనే ఉన్న ఆస్ట్రేలియా పరిమిత ఓవర్ల సారథి ఆరోన్ ఫించ్.. ఈ సమయాన్ని అసలు వృథా చేయట్లేదని చెప్పాడు. తాను క్రికెట్ ఆడకపోయినా సరే తన మెదడులో మాత్రం నిరంతరాయంగా ఆట గురించే ఆలోచిస్తున్నట్లు తెలిపాడు. మ్యాచ్ల్లో గెలుపు కోసం వ్యూహాలు రచించడానికి, ఈ సమయాన్ని కేటాయించినట్లు చెప్పుకొచ్చాడు. ముఖ్యంగా 2023 వన్డే ప్రపంచకప్ను ముద్దాడం కోసం ఇప్పటినుంచే ప్రత్యేక ప్రణాళికను సిద్ధం చేయడానికి గ్రౌండ్ వర్క్ చేస్తున్నట్లు వెల్లడించాడు. వచ్చే ఏడాది జరగబోయే టీ20 ప్రపంచకప్పైనా దృష్టి సారించినట్లు స్పష్టం చేశాడు.
"ఓ క్రికెట్ అభిమానిగా 2021 టీ20 ప్రపంచకప్, 2023 వన్డే ప్రపంచకప్ కోసం ఆసక్తిగా ఎదురుచూస్తున్నా. ఓ సారథిగా ఆ టోర్నీల్లో విజయం సాధించేందుకు పూర్తిస్థాయిలో ఎలాంటి ప్రణాళికలు సిద్ధం చేయాలి? ఏ వ్యూహాలు రచించాలి? అనే విషయమై నిరంతరం ఆలోచిస్తున్నాను. అందుకు తగ్గట్లు గ్రౌండ్వర్క్ చేస్తున్నా. ప్రతికూల పరిస్థితుల్లో ప్రత్యర్థుల్ని ఎలా మట్టికరిపించాలో ప్లాన్ వేస్తున్నా"
-ఆరోన్ ఫించ్, ఆసీస్ జట్టు కెప్టెన్
ఇప్పటివరకు వన్డే ప్రపంచకప్లో ఐదుసార్లు విజేతగా నిలిచింది ఆస్ట్రేలియా. గతేడాది ఇంగ్లాండ్లో జరిగిన ప్రపంచకప్లో సెమీఫైనల్లో ఓడిపోయింది.
ఈ ఏడాది అక్టోబరు-నవంబరులో ఆస్ట్రేలియా వేదికగానే టీ20 ప్రపంచకప్ జరగాలి. అయితే కరోనా వ్యాప్తి నేపథ్యంలో జరిగేది సందేహంగా మారింది. ఈ విషయమై ఐసీసీ త్వరలో నిర్ణయం తీసుకోనుంది. ఒకవేళ ఈ టోర్నీ రద్దయితే అదే సమయంలో ఐపీఎల్ నిర్వహించాలని బీసీసీఐ భావిస్తోంది.
ఇది చూడండి : 'మీలో పదిమంది అయినా భారత్ జట్టులోకి రావాలి'
