టీమ్ఇండియా జెర్సీ మరోసారి మారబోతోందా? అంటే అవుననే సమాధానం వినిపిస్తోంది. బీసీసీఐ.. క్రీడా పరికరాలు, దుస్తులు విక్రయించే ప్రఖ్యాత యూరోప్‌ బ్రాండ్ అడిడాస్తో ఒప్పందం కుదుర్చుకున్నట్లు తెలిసింది. దీంతో త్వరలోనే భారత ఆటగాళ్లు కొత్త జెర్సీల్లో దర్శనమివ్వనున్నట్లు సమాచారం.
కాగా 2016-2020 నైక్ సంస్థ టీమ్ఇండియా కిట్‌ స్పాన్సర్గా వ్యవహరించింది. ఆ తర్వాత రూ.370 కోట్లతో ఎంపీఎల్‌ స్పోర్ట్స్‌ హక్కులను దక్కించుకుంది. కానీ 2023, డిసెంబర్‌ వరకు హక్కులు ఉన్నప్పటికీ మధ్యలోనే గుడ్ బై చెప్పేసింది. దీంతో కిల్లర్ జీన్స్ సీన్లోకి ఎంట్రీ ఇచ్చింది. అలా ఈ సంస్థ బంగ్లాదేశ్‌ సిరీస్ నుంచి కిట్‌ స్పాన్సర్గా వ్యవహరిస్తోంది. అయితే ఇప్పుడు ఈ కిల్లర్ జీన్స్.. ఒప్పందం పూర్తైన తర్వాత ప్రముఖ బ్రాండ్ అడిడాస్తో డీల్ కుదుర్చుకునేందుకు బీసీసీఐ సిద్ధమైనట్లు సమాచారం అందింది. ఈ డీల్ వల్ల బీసీసీఐకి కాసుల పంట కురిసే అవకాశముంది. అంతా అనుకున్నట్లు జరిగితే జూన్‌ 1 నుంచి ఈ ఒప్పందం అమల్లోకి వచ్చే అవకాశం ఉందని తెలుస్తోంది.
అంటే జూన్‌ 7 నుంచి జరుగనున్న ప్రపంచ టెస్టు ఛాంపియన్‌షిప్‌ ఫైనల్లో రోహిత్‌ సేన అడిడాస్ జెర్సీలో దర్శనమివ్వనుంది. కాగా ఇప్పటికే ఐపీఎల్‌ టీమ్ ముంబయి ఇండియన్స్‌ సహా ఇంగ్లాండ్ క్రికెట్‌ టీమ్‌కు అడిడాస్ జెర్సీ స్పాన్సర్గా వ్యవహరించిన సంగతి తెలిసిందే. ఇకపోతే ప్రస్తుతం టీమ్ఇండియా ప్లేయర్స్ రోహిత్‌ శర్మ, కుల్‌దీప్‌ యాదవ్‌, రిషభ్‌ పంత్‌ ఈ బ్రాండ్ ప్రచారకర్తలుగా కొనసాగుతున్నారు. అయితే ఈ అడిడాస్ సంస్థ.. ప్రస్తుతం నాటింగ్‌హామ్‌ షైర్‌, సౌత్‌ ఈస్ట్‌ స్టార్స్‌, సర్రే టీమ్స్కు జెర్సీ స్పాన్సర్లుగా వ్యవహరిస్తోంది.
ఇకపోతే బోర్డర్ గావస్కర్ ట్రోఫీలో భాగంగా ఆస్ట్రేలియాతో జరుగుతున్న నాలుగు మ్యాచ్ల టెస్ట్ సిరీస్లో.. తొలి రెండు మ్యాచుల్లో టీమ్ఇండియానే విజయం సాధించింది. ప్రస్తుతం 2-0తేడాతో ఆధిక్యంలో ఉంది. మూడో మ్యాచ్ మార్చి 1నుంచి ప్రారంభం కానుంది.
ఇదీ చూడండి: 'కోహ్లీ ఎప్పుడూ సూపరే'.. అతడు చేసిన పనికి ఫ్యాన్స్ ఫిదా!
