దర్శకధీరుడు రాజమౌళి దర్శకత్వంలో తెరకెక్కుతున్న చిత్రం 'ఆర్ఆర్ఆర్'.ఈ చిత్రంలో కొమరం భీమ్‌గా జూనియర్ ఎన్టీఆర్ కనిపించనున్నాడు. ఇప్పటికే ఈ సినిమా 70 శాతం చిత్రీకరణ పూర్తి చేసుకుందని చిత్ర బృందం ప్రకటించింది. ఆర్ఆర్ఆర్ తర్వాత తారక్ ఏ దర్శకుడితో సినిమా చేస్తాడో ఇంకా స్పష్టత రాలేదు. కానీ ఆ వరుసలో చాలా మంది దర్శకుల పేర్లు వినిపిస్తున్నాయి. వీరిలో మాటల మాంత్రికుడు త్రివిక్రమ్‌ పేరు ముందుంది. త్రివిక్రమ్‌ ఓ కుటుంబ కథను సిద్ధం చేస్తున్నాడని.. 'ఆర్ఆర్ఆర్' తరువాత తారక్ ఈ సినిమాలోనే నటిస్తాడని ప్రచారం జరుగుతోంది. గతేడాది వీరిద్దరి కలయికలో 'అరవింద సమేత' తెరమీదకొచ్చింది.
మరోవైపు 'కేజీయఫ్‌' దర్శకుడు ప్రశాంత్ నీల్తో ఎన్టీఆర్ సినిమా చేయబోతున్నట్టు ఫిలింనగర్‌లో వార్తలు వినిపిస్తున్నాయి. ఇప్పటికే నీల్ తారక్‌కు కథ కూడా వినిపించేశాడట. తమిళ దర్శకుడు అట్లి కూడా తారక్‌తో సినిమా కోసం ఎదురు చూస్తున్నట్టు వినికిడి. తాజాగా ఈ జాబితాలోకి ప్రముఖ దర్శకుడు మురుగదాస్‌ కూడా వచ్చి చేరాడు.
అయితే ఇప్పటి వరకు తారక్ నటించబోయే తర్వాతి సినిమాపై ఎటువంటి అధికారిక ప్రకటన వెలువడలేదు. ప్రస్తుతం ఈ దర్శకులంతా తారక నామస్మరణే చేస్తున్నారు. మరి వీరిలో ఎవరికి అవకాశం ఉంటుందో తెలియాలంటే మరికొంత కాలం ఎదురు చూడాల్సిందే. 'ఆర్ఆర్ఆర్' సినిమా విడుదల తరువాతే తారక్ తదుపరి సినిమాపై అధికారిక ప్రకటన వచ్చే అవకాశం ఉంది. అయితే ఆర్ఆర్ఆర్లోని కథానాయకుల ఫస్ట్‌ లుక్‌ని నూతన సంవత్సరం కానుకగా జనవరి 1న విడుదల చేసే అవకాశాలున్నాయి.వచ్చే ఏడాది జులై 30న ఈ చిత్రం ప్రేక్షకుల ముందుకు రానుంది.
ఇదీ చదవండి:- 'గత 18 ఏళ్లలో ఐదు రోజులే సెలవు తీసుకున్నా'
