'అపరిచితుడు' హిందీ రీమేక్కు ఇప్పట్లో చిక్కులు వీడేలా లేవు. 2005లో విడుదలైన ఈ చిత్రాన్ని హిందీ రీమేక్ చేయాలన్న శంకర్ ప్రయత్నాన్ని ఆ చిత్ర నిర్మాత రవిచంద్రన్ అడ్డుకుంటున్నారు. రణ్వీర్ సింగ్ కథానాయకుడిగా శంకర్ దర్శకత్వంలో 'అన్నియన్'కు రీమేక్ (anniyan remake) రానుందన్న ప్రకటనను రవిచంద్రన్ తప్పుపట్టారు. ఇప్పటికే ఈ విషయంపై సౌత్ ఇండియన్ ఫిల్మ్ ఛాంబర్ను ఆశ్రయించారు. ఈ సమస్య పరిష్కారం కోసం రవిచంద్రన్ ఇప్పుడు కోర్టు మెట్లు ఎక్కనున్నారు. దర్శకుడు శంకర్, హిందీ రీమేక్కు నిర్మాతైన జయంతీలాల్ గాదాలపై మద్రాస్ హైకోర్టులో కేసు వేయనున్నట్లు ప్రకటించారు.
"ఎస్ఐఎఫ్సీసీ నాకు మద్దతుగా నిలిచింది. ఈ వివాదంపై ఇప్పుడే కోర్టును ఆశ్రయించవద్దని సూచించారు. ఎస్ఐఎఫ్సీసీ.. ముంబయిలోని ఫిల్మ్ అసోసియేషన్ను కూడా సంప్రదించింది. నేను ఇప్పుడు చర్చలు జరపాల్సింది హిందీ రీమేక్కు నిర్మాతైన గాదేజీతో కానీ శంకర్తో కాదు."
-వి రవిచంద్రన్, అన్నియన్ నిర్మాత
అసలు ఏంటీ గొడవ?
తమిళంలో అన్నియన్ పేరుతో స్టార్ దర్శకుడు శంకర్ తెరకెక్కించిన ఈ చిత్రం బాక్సాఫీసు వద్ద ఘన విజయం సాధించింది. 2005లో విడుదలైన ఈ చిత్రానికి తెలుగులో కూడా మంచి ఆదరణ లభించింది. తెలుగులో ఈ సినిమా 'అపరిచితుడి'గా ప్రేక్షకుల ముందుకు వచ్చింది. ఈ బ్లాక్బస్టర్ను హిందీలో రీమేక్ చేసి పాన్ ఇండియా సినిమాగా విడుదల చేయాలని శంకర్ భావించారు. ఇందులో హీరోగా రణ్వీర్ సింగ్ పేరు కూడా ఖరారైంది.
ఈ ప్రకటనతోనే వివాదం మొదలైంది. ఈ సినిమాపై తనకు సర్వ హక్కులు ఉన్నాయని.. తనను సంప్రదించకుండా ఈ చిత్రాన్ని ఎలా రీమేక్ చేస్తారంటూ రవిచంద్రన్ ప్రశ్నించారు. ఈ సినిమా కథ తనదే అని.. శంకర్కు కేవలం దర్శకత్వం బాధ్యతలు అప్పగించినట్లు చెప్పుకొచ్చారు. రవిచంద్రన్ వ్యాఖ్యలకు కౌంటర్గా శంకర్ స్పందించారు. ఈ సినిమా కథ తనదే అని.. ఆ విషయం అందరికీ తెలుసని పేర్కొన్నారు.
ఇటీవల కాలంలో శంకర్ వివాదాల్లో చిక్కుకుంటున్నారు. 'భారతీయుడు- 2' సినిమా చిత్రీకరణపై నిర్మాతలు శంకర్పై హైకోర్టులో కేసు దాఖలు చేశారు. అయితే ఆ కేసును మద్రాస్ హైకోర్టు కొట్టివేసింది.
ఇదీ చదవండి : 'ఫిదా', 'ఉప్పెన' ఆ హీరోలతో చేయాల్సింది.. కానీ!
