WhatsApp new features: వినియోగదారులకు ఎప్పటికప్పుడు కొత్త ఫీచర్లను అందుబాటులోకి తీసుకొస్తోంది ప్రముఖ సామాజిక మాధ్యమ దిగ్గజం వాట్సాప్. తాజాగా స్పామ్, తప్పుడు సమాచార వ్యాప్తిని అరికట్టేందుకు మరో కొత్త ఫీచర్ను తీసుకొచ్చింది. వాట్సాప్లో ఇప్పటి వరకు ఓ సందేశాన్ని ఐదుగురికి ఒకేసారి ఫార్వర్డ్ చేయొచ్చు. వాటికి 'ఫార్వర్డెడ్' అనే ట్యాగ్ వస్తుంది. అయితే.. స్పామ్ను తగ్గించే ఉద్దేశంతో తీసుకొస్తున్న ఈ కొత్త ఫీచర్తో మెసేజ్లను ఇతర గ్రూపుల్లో, వ్యక్తిగత చాట్లకు పంపటంపై పరిమితులు విధించింది. 'ఫార్వర్డెడ్ మెనీ టైమ్స్' ట్యాగ్తో కేవలం ఒకసారి ఒకే గ్రూప్ లేదా ఒక వ్యక్తికి షేర్ చేయొచ్చు.
గత నెలలో అందుబాటులోకి తీసుకొచ్చిన వాట్సాప్ బీటా వర్షన్ ఆడ్రాయిడ్ 2.22.7.2 అప్డేట్లో సందేశాలను ఇతరులకు పంపించే వాటిపై పరిమితులు విధించింది. వాట్సాప్ సందేశాలపై పరిమితులు విధించటంపై వినియోగదారుల్లో వ్యతిరేకత ఉన్నప్పటికీ.. కొత్త ఫీచర్ను తీసుకురావటాన్ని సమర్థించుకుంది సంస్థ. 'ఇకపై సందేశాలు ఒకసారి ఒకే గ్రూప్ లేదా వ్యక్తికి ఫార్వర్డ్ చేయొచ్చు. వాట్సాప్లో సంభాషణలను వ్యక్తిగతంగా ఉంచటంలో ఇది సహాయపడుతుంది. అలాగే వదంతులు, వైరల్ మెసేజెస్, అసత్య వార్తల వ్యాప్తిని తగ్గించేందుకు సాయపడుతుంది.' అని వాట్సాప్ పేర్కొంది.
ఎర్రర్ మెసేజ్: ఎవరైన ఫార్వర్డ్ సందేశాన్ని రెండు లేదా అంతకన్నా ఎక్కువ గ్రూపులకు పంపాలని ప్రయత్నిస్తే ఎర్రర్ మెసేజ్ వస్తుంది. 'ఫార్వర్డెడ్ మెసేజ్లు కేవలం ఒకసారి ఒకే గ్రూప్లోకి పంపించవచ్చు' అనే సందేశంతో పాపప్ మెనూ కనిపిస్తుంది. వాట్సాప్బీటాఇన్ఫో ప్రకారం ఈ కొత్త ఫీచర్ను ఐఓఎస్ ఆపరేటింగ్ సిస్టమ్స్లోనూ అందుబాటులోకి తీసుకొచ్చేందుకు ప్రయత్నాలు జరుగుతున్నాయి. ఆండ్రాయిడ్ బీటా వర్షన్లో తీసుకొచ్చిన నెల రోజుల తర్వాత ఐఓఎస్ ప్రయత్నాలు చేపట్టింది. వాట్సాప్ ఐఓఎస్ బీటా వర్షన్ 22.7.0.76లో ప్రస్తుతం అందుబాటులో ఉంది. ఈ కొత్త ఫీచర్ త్వరలోనే అందరికి అందుబాటులోకి రానుంది.
ఇదీ చూడండి: ఫోన్‌ నంబర్‌ సేవ్ చేయకుండానే.. వాట్సాప్ చాట్, వాయిస్‌ కాలింగ్
