మీ లొకేషన్​ ట్రాక్ చేస్తున్నాయని ఆ యాప్స్​పై డౌటా? ఇలా చేయండి!

ఫోన్‌లో కొత్తగా ఏదైనా యాప్‌ ఇన్‌స్టాల్‌ చేయాలంటే.. సదరు యాప్‌ యూజర్‌ నుంచి కొన్ని రకాల అనుమతులు కోరుతుంది. వాటిలో లొకేషన్‌, మీడియా ఫైల్స్‌ వంటివి తప్పనిసరిగా ఉంటాయి. ఉదాహరణకు మ్యాప్స్‌, ఫుడ్‌ డెలివరీ, రైడింగ్‌ యాప్స్‌ లొకేషన్‌ డేటా ఆధారంగానే యూజర్లకు సేవలందిస్తాయి. ఇవికాకుండా కొన్ని థర్డ్‌ పార్టీ యాప్స్‌ లొకేషన్‌కు సంబంధించిన సమాచారం అవసరం లేకున్నా యూజర్‌ లొకేషన్‌ డేటాను ట్రాక్‌ చేస్తున్నాయట. దీనివల్ల యూజర్‌ గోప్యతకు భంగం వాటిల్లుతుందనేది వాదనలు వినిపిస్తున్నాయి. ఈ నేపథ్యంలో ఆండ్రాయిడ్, ఐఓఎస్‌లోని యాప్స్‌ లొకేషన్‌ డేటా ట్రాకింగ్‌ నుంచి తప్పించుకునేందుకు ఏం చేయాలో తెలుసుకుందాం.

How to temporarily disable location sharing: ఫోన్‌లో మనం డౌన్‌లోడ్ చేసే ప్రతి యాప్‌ దాదాపు లొకేషన్‌ అనుమతి కోరుతుంది. సదరు యాప్‌ సేవలకు, లొకేషన్‌ డేటాకు ఎలాంటి సంబంధం లేకున్నా యూజర్‌ డేటా సేకరణ కోసం ఇలాంటి అనుమతులు కోరుతుంటాయి. అందుకే ముందుగా ఏఏ యాప్స్‌ మీ లొకేషన్‌ డేటాను ట్రాక్‌ చేస్తున్నాయనేది తెలుసుకోవాలి. అంటే మీరు యాప్‌ ఓపెన్ చేసిన వెంటనే లొకేషన్‌ ఆన్‌ చేయమని అడిగే యాప్స్‌. వాటిలో ఏ యాప్స్‌ సేవలకు తప్పనిసరిగా లొకేషన్‌ అనుమతి అవసరం అనేది గుర్తించాలి. ఉదాహరణకు పైన పేర్కొన్నట్లు ఫుడ్‌ డెలివరీ, రైడింగ్ యాప్స్‌, గూగుల్ మ్యాప్స్‌ వంటి వాటికి లొకేషన్‌ అనుమతి ఉండాలి. ఇవి కాకుండా కొన్ని సోషల్‌ మీడియా యాప్స్‌, వీడియో స్ట్రీమింగ్ యాప్స్‌, ఫిన్‌టెక్‌ యాప్స్‌ కూడా యూజర్‌ లొకేషన్‌ డేటాను ట్రాక్‌ చేస్తున్నాయని సైబర్‌ సెక్యూరిటీ సంస్థలు తెలిపాయి.

అడ్డుకోవడం ఎలా..?
ఇటీవలి కాలంలో సమాచార మార్పిడిలో సోషల్‌ మీడియా యాప్స్‌ కీలక పాత్ర పోషిస్తున్నాయి. ఈ నేపథ్యంలో ఆయా సంస్థలు యూజర్లు నుంచి డేటా (ఆన్‌లైన్‌లో దేనికోసం ఎక్కువగా వెతుకుతున్నారు, ఎక్కడెక్కడికి వెళుతున్నారు, ఆన్‌లైన్‌ షాపింగ్) సేకరించి దానికనుగుణంగా ప్రకటనలు పంపుతుంటాయి. ఇది తప్పనిసరిగా యూజర్ల గోప్యతకు భంగం వాటిల్లే చర్యగా టెక్‌ నిపుణులు అభిప్రాయపడుతున్నారు. మరి యాప్స్‌కు లొకేషన్‌ డేటా డిసేబుల్‌ చేసేందుకు ఈ కింది విధంగా చేయాలి.

Disable location sharing Android:

• ఫోన్‌ సెట్టింగ్స్‌ (Settings) > యాప్స్‌ అండ్‌ నోటిఫికేషన్స్‌ (Apps and Notifications) > యాప్‌ పర్మిషన్స్‌ (App Permissions) > లొకేషన్‌ (Location) సెక్షన్‌ ఓపెన్ చేస్తే లొకేషన్‌ ట్రాకింగ్‌ అనుమతి ఉన్న యాప్స్‌ జాబితా చూపిస్తుంది.
• అందులో ఎలోడ్ ఆల్‌ ది టైమ్‌ (Allowed All The Time), ఎలోడ్‌ ఓన్లీ వైల్‌ ఇన్‌ యూజ్‌ (Allowed Only While in Use) అని రెండు ఆప్షన్స్‌ ఉంటాయి.
• వాటిలో ‘ఎలోడ్ ఆల్‌ ది టైమ్‌’ సెక్షన్‌లో ఉన్న యాప్స్‌ ఓపెన్ చేసి వాటికి ‘ఎలోడ్‌ ఓన్లీ వైల్‌ ఇన్‌ యూజ్‌’ ఆప్షన్‌ను సెలెక్ట్ చేయాలి.
• దానివల్ల మీరు యాప్‌ వాడుతున్నప్పుడు మాత్రమే లొకేషన్‌ను డేటా అనుమతి ఉంటుంది. ఒకవేళ సోషల్‌ మీడియా, వీడియో స్ట్రీమింగ్ యాప్స్‌ వంటివి కూడా ఉంటే వాటికి డోంట్ ఎలో (Don't Allow) ఆప్షన్‌ను సెలెక్ట్ చేస్తే అవి మీ లొకేషన్‌ డేటాను ట్రాక్ చేయలేవు.

Disable location sharing iphone:
సెట్టింగ్స్‌ (Settings) > ప్రైవసీ (Privacy)> లొకేషన్‌ సర్వీసెస్‌ (Location Services) ఓపెన్‌ చేసి పైన పేర్కొన్న విధంగా అవసరం ఉన్న యాప్స్‌కు మాత్రమే లొకేషన్‌ అనుమతి ఇస్తే సరిపోతుంది. అవసరంలేని వాటికి లొకేషన్‌ డేటాను డిసేబుల్ చేస్తే ట్రాకింగ్ చేయడం సాధ్యంకాదు. అలా అనవసరపు యాప్స్‌ మీ డేటా లొకేషన్‌ను ట్రాక్‌ చేయకుండా అడ్డుకోవచ్చు.