Sankranti 2024 Non Veg Special Recipe : సంక్రాంతి వచ్చిందంటే చాలు పల్లెటూళ్లలో పండగ వాతావరణం నెలకొంటుంది. చిన్నా, పెద్దా తేడా లేకుండా తెలుగు ప్రజలంతా సంక్రాంతి వచ్చిందే తుమ్మెదా.. సరదాలు తెచ్చిందే తుమ్మెదా.. అంటూ సరదాగా ఆడుతూ పాడుతూ సంబరాలు చేసుకుంటారు. ఈ పండగలో భాగంగా ఇంటిముందు అందమైన రంగురంగుల ముగ్గులు, వాటి మధ్యలో గొబ్బెమ్మలు, హరిదాసు కీర్తనలు, గంగిరెద్దుల విన్యాసాలు, కోడి పందాలు.. ఇలా ఎన్నో ప్రత్యేకతలుంటాయి. ముఖ్యంగా ఇంటికొచ్చిన బంధుమిత్రులతో ఇల్లంతా పండగ శోభను సంతరించుకుంటుంది. ఇదంతా ఒక ఎత్తయితే.. మరోవైపు ఘుమఘుమలాడే పిండి వంటలు, రకరకాల నాన్ వెజ్ వంటకాలు ఈ పండక్కి స్పెషల్ ఎట్రాక్షన్గా నిలుస్తాయి..
ఇక చాలా మంది నాన్వెజ్లో సంక్రాంతి(Sankranti 2024)కి నాటుకోళ్లు వండుకొని తినడానికి ఆసక్తి చూపిస్తారు. నిజానికి దీని రుచే వేరు. కూర, వేపుడు, పలావ్, బిర్యానీ ఏది చేసినా ఆ టేస్టే అదిరిపోతుంది. అలా తింటుంటే ఇలా నోట్లోకి వెళ్తూనే ఉంటుంది. అయితే ప్రతిసారిలా కాకుండా ఈ సారి నాటుకోడి పులుసు ఇలా ట్రై చేయండి.. అందరు ఆహా అనడమే కాదు.. ఒక్క ముక్క కూడా మిగలకుండా దంచి పడేస్తారు. చెప్తూంటేనే నోట్లో నీళ్లు ఊరుతున్నాయి కదా.. మరింకెందుకు ఆలస్యం.. నాటుకోడి పులుసు ఎలా సిద్ధం చేసుకోవాలో ఈ స్టోరీలో తెలుసుకుందాం..
నాటుకోడి పులుసుకు కావాల్సిన పదార్థాలు :
- నాటుకోడి మాంసం - అర కేజీ
- తరిగిన ఉల్లిపాయలు- 2
- పచ్చిమిర్చి-6
- టమాటాలు - రెండు(చిన్నవి)
- నూనె- తగినంత
- బిర్యానీ ఆకులు- 4
- కారం - రుచికి సరిపడినంత
- పసుపు - కొద్దిగా
- అల్లం వెల్లుల్లి పేస్ట్-1 పెద్ద స్పూన్
- ఉప్పు-సరిపడా
- పెరుగు-కొద్దిగా
- కరివేపాకు-కొద్దిగా
- కొత్తిమీర-1 కట్ట(తురుముకోవాలి.)
ముందుగా మీరు అర కేజీ నాటుకోడి మాంసం సిద్ధం చేసుకొని ఉండాలి. అంటే నాటు కోడిని కోసి దాన్ని క్లీన్ చేసి ముక్కలు కట్ చేసి పెట్టుకోవాలి. అలాగే ముందుగానే మసాలా పొడి, పేస్ట్ను రెడీ చేసుకుని ఉండాలి.
మసాలా పొడి తయారు చేసుకునే విధానం.. అనాస పువ్వు-1, దాల్చిన చెక్క, బిర్యానీ ఆకు ఒకటి, ఎండుమిర్చి - 3, లవంగాలు-6, యాలకులు - 4, వెల్లుల్లి రెబ్బలు-8, కొద్దిగా జాజికాయ పొడి, ఒక స్పూన్ ధనియాలు.. తీసుకుని ఒక పాత్రలో దోరగా వేయించుకుని మిక్సీ పట్టుకొని మసాలా పొడి సిద్ధం చేసి పక్కకు పెట్టుకోవాలి.
మసాలా పేస్ట్ తయారుచేసుకోండిలా.. జీడిపప్పు- పావు కప్పు, రెండు స్పూన్లు ఎండు కొబ్బరి ముక్కలు, అర టీ స్పూన్ - గసగసాలు, రెండు స్పూన్లు - సారపప్పు వీటిని కూడా ఒక జార్లోకి తీసుకుని కొన్ని నీళ్లు పోసుకుని పేస్ట్లాగా మిక్సీ పట్టుకుని పక్కన పెట్టుకోవాలి.
How to Prepare Methi Mutton Curry : మటన్ ఎప్పుడూ ఒకేలా ఏం తింటారు..? ఈ సండే ఇలా ట్రై చేయండి!
నాటుకోడి పులుసు తయారీ విధానం :
- ఇక ఇప్పుడు మీరు ఒక కుక్కర్ తీసుకుని స్టౌవ్పై పెట్టి అందులో తగినంత నూనె వేసి వేడి చేసుకోవాలి.
- కాస్త ఆయిల్ హీట్ అయ్యాక ముందుగా తరిగి పెట్టుకున్న ఉల్లిపాయలు, పచ్చిమిర్చి వేసుకుని పచ్చి వాసన పోయే వరకు వేయించుకోవాలి.
- ఆపై అల్లం వెల్లుల్లి పేస్ట్ వేసి మరికాసేపు దానిని ఫ్రై చేసుకోవాలి. అనంతరం తగినంత ఉప్పు, పసుపు, కారం యాడ్ చేసుకుని మరికాసేపు ఆ మిశ్రమాన్ని వేయించుకోవాలి.
- అప్పుడు నూనె పైకి తేలిన తర్వాత మీరు సిద్ధం చేసుకున్న టమాటాలను ప్యూరీలాగా చేసుకుని అందులో వేసుకోవాలి.
- అనంతరం పెరుగు కూడా దానికి యాడ్ చేసుకుని చిన్న మంట మీద ఆ మిశ్రమాన్ని ఫ్రై చేసుకోవాలి.
- ఇక తర్వాత మీరు ముందుగా శుభ్రంగా కడిగి పక్కకు పెట్టుకున్న నాటుకోడి ముక్కలను ఆ మిశ్రమంలో వేసి కలపాలి.
- ముక్కలను కొంచెం ఫ్రై అయ్యాక.. ముందుగానే రెడీ చేసుకున్న మసాలా పేస్ట్నూ వేసి దానిని మరోసారి కలుపుకోవాలి.
- ఇవన్నీ చికెన్కి బాగా పట్టేలా ఓ 5 నిమిషాలు ఉడికించుకోవాలి. తర్వాత సరిపడా వాటర్ పోసుకోవాలి.
- అనంతరం కుక్కర్ మూత పెట్టి.. 6 విజిల్స్ వచ్చేంత వరకూ ఉడికించుకోవాలి. ఒకవేళ ముక్క ఉడకకపోతే ఇంకో రెండు విజిల్స్ వచ్చేంతవరకు ఉడికించుకోవాలి.
- ఆ తర్వాత.. ముందుగా రెడీ చేసుకున్న మసాలా పొడిని వేసుకుని మరికాసేపు దానిని ఉడికించుకోవాలి.
- ఇక చివరగా ఒకసారి ఉప్పు చూసుకుని కొత్తిమీర చల్లుకోవాలి.
- అంతే ఎంతో టేస్టీగా ఉండే సంక్రాంతి నాటు కోడి పులుసు రెడీ.
ఇక దీనిని తిన్నారంటే మీతో పాటు ఇంటికి వచ్చిన బంధువులు ఆహా ఏమి రుచి.. అనాల్సిందే. ఇంకెందుకు ఆలస్యం మీరు ఈ సంక్రాంతికి ఈ రెసిపీ ట్రై చేయండి.
How to Prepare Palak Prawns Curry : 'పాలక్ ప్రాన్స్ కర్రీ..' నోరూరిపోవాల్సిందే!
ఈ చలిలో మటన్ పాయా.. సూప్ జుర్రేస్తే జిందగీ ఖుష్ అవ్వాల్సిందే!
