'పెగసస్'.. ప్రస్తుతం భారత్తో పాటు ప్రపంచాన్ని కుదిపేస్తోన్న అంశం. ఈ స్పైవేర్ దుర్వినియోగంపై ఆరోపణలతో దాని మాతృ సంస్థ అయిన ఇజ్రాయెల్కు చెందిన ఎన్ఎస్ఓ గ్రూప్ చర్యలు చేపట్టింది. ప్రపంచవ్యాప్తంగా ఈ స్పైవేర్ను వినియోగిస్తోన్న పలు దేశాల్లోని క్లయింట్లను తాత్కాలికంగా బ్లాక్ చేసినట్లు అమెరికా మీడియా తెలిపింది.
ఈ అంశంపై దర్యాప్తు చేపట్టిన మీడియా సంస్థల కన్సార్టియం.. స్పైవేర్ను ఉపయోగించి హ్యాకింగ్, ఫోన్ల ట్యాపింగ్, నిఘా కోసం ఉపయోగించినట్లు నివేదిక సమర్పించింది. ఈ దర్యాప్తును అనుసరించే పలు దేశాలను బ్లాక్ చేసినట్లు తెలుస్తోంది. 'కొందరు వినియోగదారులపై దర్యాప్తు జరిగింది. అందులో కొందరిని తాత్కాలికంగా బ్లాక్ చేశారు.' అని ఇజ్రాయెల్ సంస్థ ఎన్ఎస్ఓలోని ఓ ఉద్యోగి తెలిపినట్లు నేషనల్ పబ్లిక్ రేడియో(ఎన్పీఆర్) వెల్లడించింది. అయితే.. ఏ ప్రభుత్వాలు, దేశాలు అనేది బయటకి చెప్పలేదని తెలిపింది.
ఈ స్పైవేర్ లక్ష్యంగా చేసుకున్నట్లు వచ్చిన కొన్ని ఫోన్ నంబర్లను పరిశీలిస్తూ.. అంతర్గతంగా దర్యాప్తు చేపడుతోంది ఎన్ఎస్ఓ. ప్రతి ఒక్క అంశాన్ని పరిశీలించామని, ఆ ఫోన్లతో పెగసస్కు ఎలాంటి సంబంధం లేదని తేలినట్లు సంస్థ అధికారి ఒకరు తెలిపారు. అయితే.. పెగసస్ దుర్వినియోగం అయిందనే అంశాన్ని కప్పిపుచ్చుతున్నారా? అనే ప్రశ్నకు సమాధానమివ్వకపోవటం గమనార్హం. మీడియా ప్రశ్నలకు సమాధానం ఇచ్చేది లేదని స్పష్టం చేశారు.
ఎన్ఎస్ఓపై ఇజ్రాయెల్ దర్యాప్తు..
పెగసస్ స్పైవేర్ను ఇతర దేశాలకు విక్రయించటాన్ని నియంత్రించినప్పటి నుంచి ఇజ్రాయెల్ ప్రభుత్వం సైతం ఒత్తిడిని ఎదుర్కొంటోంది. తాజాగా ఈ వ్యవహారం బయటకి వచ్చిన క్రమంలో.. ఎన్ఎస్ఓపై దర్యాప్తు చేపట్టింది ఇజ్రాయెల్ సర్కారు. ఆ దేశంలోని టెల్ అవివాకు సమీపంలోని హెర్జ్లియాలోని ఎన్ఎస్ఓ కార్యాలయాన్ని అధికారులు గత బుధవారం తనిఖీ చేశారు. సంస్థ పాత్రపై వచ్చిన ఆరోపణల మేరకే తనిఖీ చేసినట్లు రక్షణ శాఖ తెలిపింది. ఈ దర్యాప్తునకు ఎన్ఎస్ఓ పూర్తి సహకారం అందించినట్లు తెలిపింది. మీడియా కథనాల్లో వచ్చిన పేర్లు పెగసస్ లక్ష్యం కాదనే అంశాన్ని నిరూపించాలని డిమాండ్ చేసింది.
బ్లాక్ చేసిన దేశాలు ఇవేనా?
తమకు 40 దేశాల్లో 60 మంది వినియోగదారులు ఉన్నట్లు ఎన్ఎస్ఓ తెలిపింది. వారంతా నిఘా సంస్థలు, మిలిటరీ, పోలీసు విభాగాలుగా పేర్కొంది. తాజాగా బయటపడిన మీడియా కథనాలకన్న ముందే.. కొద్ది రోజుల క్రితం ఐదు ప్రభుత్వ ఏజెన్సీలను స్పైవేర్ దుర్వినియోగం నేపథ్యంలో బ్లాక్ చేసినట్లు గుర్తు చేసింది.
మరోవైపు.. పెగసస్ స్పైవేర్ వినియోగించకుండా బ్లాక్ చేసిన దేశాల్లో సౌదీ అరేబియా, యూఏఈలో దుబాయ్, మెక్సికోలోని కొన్ని ప్రభుత్వ సంస్థలు ఉన్నట్లు వాషింగ్టన్ పోస్ట్ తెలిపింది.
ఇదీ చూడండి: పెగసస్ వ్యవహారంపై ఇజ్రాయెల్ దర్యాప్తు షురూ
