ఇజ్రాయెల్, హమాస్(Hamas) మధ్య ఇటీవల 11 రోజుల పాటు జరిగిన మారణహోమం యావత్ ప్రపంచాన్ని ఆందోళనకు గురి చేసింది. ఈ దాడుల్లో గాజా తీవ్రంగా నష్టపోయింది. ఈ క్రమంలో ఇజ్రాయెల్, హమాస్ ఉగ్రవాదుల మధ్య సంధి, గాజా పునర్నిర్మాణం కోసం కృషి చేస్తోంది ఈజిప్ట్. ఈ క్రమంలోనే ఇజ్రాయెల్, ఈజిప్ట్ మధ్య ఇరుదేశాల్లో ఆదివారం ఉన్నతస్థాయి చర్చలు జరిగాయి.
ఆదివారం.. ఈజిప్ట్లో పర్యటించారు ఇజ్రాయెల్ విదేశాంగ మంత్రి గబి అశ్కేనాజీ. కైరోలో ఆయనకు స్వాగతం పలికారు ఈజిప్ట్ విదేశాంగ మంత్రి సమేహ్ శుక్రి. పశ్చిమాసియాలో శాంతి పునరుద్ధరణ, గాజా కాల్పుల విరమణ కోసం ప్రయత్నిస్తున్నట్లు ఆయన తెలిపారు.
"2008 తర్వాత ఈజిప్ట్లో తొలిసారి ఇజ్రాయెల్ విదేశాంగ మంత్రి పర్యటిస్తున్నారు. కాల్పుల విరమణ, హమాస్ అధీనంలోని ఇజ్రాయెల్ సైనికుల పార్థివదేహాలు, పౌరుల విడుదల వంటి కీలక అంశాలపై ఇరువురు నేతలు చర్చించారు," అని కైరోలోని ఇజ్రాయెల్ రాయబార కార్యాలయం పేర్కొంది.
అంతకు ముందు కైరోలో దిగిన క్రమంలో ట్వీట్ చేశారు ఇజ్రాయెల్ విదేశాంగ మంత్రి గబి అశ్కేనాజీ. 'హమాస్తో శాశ్వత కాల్పుల విరమణ ఏర్పాటు, గాజా పునర్నిర్మాణం, మానవతా సాయం వంటి అంశాలపై చర్చిస్తామని' పేర్కొన్నారు.
నేతన్యాహూతో ఈజిప్ట్ నిఘా అధినేత భేటీ..
కాల్పుల విరమణ ప్రయత్నాల్లో భాగంగా ఇజ్రాయెల్ ప్రధాని బెంజమిన్ నెతన్యూహు.. జేరుసలేంలో ఈజిప్ట్ నిఘా విభాగం అధినేత అబ్బాస్ కమెల్తో భేటీ అయ్యారు. సైనికుల భౌతికకాయాలు, పౌరులను తిరిగి తీసుకురావటం, హమాస్ బలాన్ని పెంచుకోవటాన్ని నిరోధించటం వంటి అంశాలను లేవనెత్తినట్లు చెప్పారు ప్రధాని.
మరోవైపు.. హమాస్ నేతలతో మాట్లాడేందుకు గాజా వెళ్లే ముందు పాలస్తీనా అధికారులతో కమెల్ సమావేశమవుతారని ఈజిప్ట్ తెలిపింది. పాలస్తీనా ప్రజలకు ఈజిప్ట్ పూర్తి మద్దతు ఇస్తుందనే సందేశాన్ని ఆ దేశ అధ్యక్షుడు మహమౌద్ అబ్బాస్కు తెలియజేస్తారని పేర్కొంది.
ఇదీ చూడండి: కాల్పుల విరమణవైపు ఇజ్రాయెల్- పాలస్తీనా అడుగులు!
