యూనివర్సిటీలో నకిలీ కరెన్సీ నోట్ల ముద్రణ!

బల్గేరియాలోని ఓ యూనివర్సిటీలో భారీగా నకిలీ నోట్లను గుర్తించారు అధికారులు. అత్యుత్తమ నాణ్యతతో డాలర్, యూరో కరెన్సీని ముద్రించినట్లు వెల్లడించారు. ఇద్దరు నిందితులను అదుపులోకి తీసుకున్నారు.

బల్గేరియా రాజధాని సోఫియాలో నకిలీ కరెన్సీ ముఠా గుట్టు రట్టు చేశారు ఆ దేశ భద్రతా సిబ్బంది. హైక్వాలిటీ బ్యాంకు నోట్లను ఈ ముఠా ముద్రిస్తోందని అధికారులు గుర్తించారు. ఓ యూనివర్సిటీలోని ప్రింటింగ్ ప్రెస్​లో ఈ కరెన్సీని ఉత్పత్తి చేస్తున్నట్లు తెలిపారు.

నకిలీ నోట్లు ప్రింటింగ్ చేస్తున్న ప్రాంతం

అమెరికా సీక్రెట్ సర్వీస్ విభాగంతో కలిసి సంయుక్తంగా ఆపరేషన్ చేపట్టి ఈ తతంగాన్ని గుర్తించారు బల్గేరియా పోలీసులు. ఇద్దరు నిందితులను అదుపులోకి తీసుకున్నారు. ముద్రణా యంత్రాలతో పాటు, ప్రింటింగ్​కు ఉపయోగించే ఇతర పరికరాలను సీజ్ చేశారు. భారీ స్థాయిలో డాలర్, యూరో కరెన్సీ నోట్లను స్వాధీనం చేసుకున్నారు.

భారీ స్థాయిలో నకిలీ డాలర్లు

"సీజ్ చేసిన కరెన్సీ విలువ భారీగా ఉంది. 4 మిలియన్ డాలర్ల అమెరికా కరెన్సీ, 3.6 మిలియన్ యూరో(సుమారు 4.2 మిలియన్ డాలర్లు) కరెన్సీని మేం స్వాధీనం చేసుకున్నాం. దీన్ని బట్టి చూస్తే క్రిమినల్ కార్యకలాపాలు ఏ స్థాయిలో జరుగుతున్నాయో అర్థమవుతోంది."

-జార్జీ హాడ్జీవ్, సోఫియా పోలీసు ఉన్నతాధికారి

అరెస్టైన ఇద్దరు నిందితులు భారీ కుట్రలో భాగస్థులేనని పోలీసులు అనుమానిస్తున్నారు. నకిలీ డాలర్లను ఉక్రెయిన్​కు, నకిలీ యూరోలను పశ్చిమ ఐరోపాకు తరలించేందుకు యత్నిస్తున్నారని చెప్పారు.

ప్రింటింగ్ యంత్రంలో ఉపయోగించే షీట్లు

నకిలీ యూరోలు

ఇదీ చదవండి: కుప్పకూలిన మిగ్​-21 విమానం- పైలట్ మృతి