పాక్లో అల్లర్లు చెలరేగిన నేపథ్యంలో రాడికల్ ఇస్లామిస్ట్ పార్టీ తెహ్రీక్-ఈ-లబైక్ పాకిస్థాన్(టీఎల్పీ)పై నిషేధం విధించడానికి ప్రభుత్వం బుధవారం నిర్ణయించింది. ఆ పార్టీ అధిపతి సాద్ హుస్సేన్ రిజ్వీని అరెస్టు చేయగా సోమవారం నుంచి టీఎల్పీ దేశవ్యాప్తంగా, ప్రధానంగా పాక్లోని పంజాబ్లో నిరసనలు చేపట్టింది. ఆ పార్టీ మద్దతుదారులు వరుసగా మూడోరోజూ పోలీసులతో ఘర్షణకు దిగారు. ఈ ఘటనల్లో పోలీసులు సహా ఏడుగురు మృతి చెందారు. 300 మందికిపైగా పోలీసులు గాయపడ్డారు. తమ పార్టీ కార్యకర్తలు 12 మంది మృతి చెందినట్లు కూడా టీఎల్పీ చెబుతోంది. ఈ నేపథ్యంలో ఉగ్రవాద నిరోధక చట్టం, 1997 కింద ఆ పార్టీపై నిషేధం విధిస్తున్నట్లు పాక్ అంతర్గత వ్యవహారాల మంత్రి షేక్ రషీద్ అహ్మద్ బుధవారం తెలిపారు. టీఎల్పీని నిషేధించాలంటూ పంజాబ్ ప్రభుత్వం పంపిన ప్రతిపాదనకు ఆమోదం తెలిపినట్లు చెప్పారు. ఆ పార్టీకి నిధులందించేవారిని కూడా హెచ్చరించినట్లు పేర్కొన్నారు.
కార్టూన్లతో మొదలు..
గతంలో ప్రవక్తపై కార్టూన్లు ప్రచురించినందుకు గాను ఫ్రెంచి రాయబారిని దేశ బహిష్కరణ చేయాలంటూ టీఎల్పీ ఏప్రిల్ 20 వరకు ఇమ్రాన్ఖాన్ ప్రభుత్వానికి గడువు విధించింది. ఈ నేపథ్యంలోనే రిజ్వీని అరెస్టు చేయడం వల్ల ఆ పార్టీ పెద్దఎత్తున నిరసనలకు దిగింది. ప్రధాన రహదారులను దిగ్బంధిస్తూ ఆందోళన చేపట్టింది. ఈ సందర్భంగా పోలీసులకు ఆ పార్టీ కార్యకర్తలకు ఘర్షణలు చెలరేగాయి. ఈ మేరకు అన్ని రహదారులనూ ఖాళీ చేయించినట్లు మంత్రి అహ్మద్ తెలిపారు. 2,000 మంది టీఎల్పీ కార్యకర్తలను అరెస్టు చేసినట్లు పోలీసులు వర్గాలు తెలిపాయి.
కార్టూన్లకు సంబంధించి ఫ్రెంచి రాయబారిని ఈ ఏడాది ఫిబ్రవరి నాటికి బహిష్కరించడానికి గత ఏడాది నవంబరులోనే పాక్లోని తెహ్రీక్-ఈ-ఇన్సాఫ్ ప్రభుత్వం టీఎల్పీతో ఓ ఒప్పందంపై సంతకం చేసింది. అప్పట్లోనే పెద్దఎత్తున నిరసనకు దిగిన టీఎల్పీ ఈ ఒప్పందం కారణంగానే విరమించుకుంది. అనంతరం గడవును ఏప్రిల్ 20 వరకు పొడగించారు. ఇందుకు సంబంధించి ఓ చట్టాన్ని ప్రవేశపెట్టేందుకు తమ ప్రభుత్వం కట్టుబడి ఉందని, అయితే టీఎల్పీ దీనికి నిరాకరిస్తూ కఠినంగా వ్యవహరించాలని డిమాండ్ చేసిందని మంత్రి చెబుతున్నారు.
ఇదీ చూడండి:'మయన్మార్ నిరసనల్లో 51 మంది పిల్లలు మృతి'
ఇదీ చూడండి:'మే 1 నుంచి అమెరికా బలగాల ఉపసంహరణ'
