టిక్టాక్ను నిషేధించాలన్న డిమాండ్లు ఆస్ట్రేలియాలోనూ గట్టిగా వినిపిస్తున్నాయి. భారత్ తరహాలో ఆ యాప్ను బ్యాన్ చేయాలని ఆస్ట్రేలియా చట్టసభ్యులు ప్రభుత్వాన్ని కోరుతున్నారు. సౌత్ చైనా మార్నింగ్ పోస్ట్ ఈమేరకు ఓ కథనం ప్రచురించింది.
టిక్టాక్ డేటాను చైనా ప్రభుత్వం దుర్వినియోగం చేస్తోందని ఆరోపించారు ఆస్ట్రేలియా చట్టసభ్యుడు జిమ్ మోలన్. మరో సభ్యుడు జెన్నీ మెక్ఆలిస్టర్ ఇదే తరహా అభిప్రాయం వ్యక్తంచేశారు. "సామాజిక మాధ్యమాల ద్వారా విదేశీ ప్రభుత్వాల జోక్యం"పై ఏర్పాటైన స్థాయీ సంఘం ముందు టిక్టాక్ ప్రతినిధులు హాజరై, విచారణ ఎదుర్కోవాలని డిమాండ్ చేశారు జెన్నీ.
డేటా దుర్వినియోగంపై ఆరోపణల్ని టిక్టాక్ ఖండించినా... చైనా ప్రభుత్వం యూజర్ల వ్యక్తిగత సమాచారాన్ని యాక్సెస్ చేయడం లేదనేందుకు ఎలాంటి ఆధారాలు లేవని తన కథనంలో పేర్కొంది సౌత్ చైనా మార్నింగ్ పోస్ట్.
