మహిళలు లోదుస్తులు కొనాలంటే ఎన్నో ఇబ్బందులు పడాల్సి ఉంటుంది. సరైన కొలతల్లో లోదుస్తులు కొనుక్కోవటం వారికి సవాలే. ఒక్కోసారి అవి సరిపడక అసౌకర్యానికి లోనవుతారు. ఇలాంటి సమస్యలకు చెక్ పెడుతూ జపాన్లోని 'వాకోల్' మహిళల లోదుస్తుల కంపెనీ.. కొత్త సాంకేతికతను అందుబాటులోకి తెచ్చింది. టోక్యోలోని హరాజుకు స్టోర్లో త్రీడీ టెక్నాలజీని జోడించి శరీరాన్ని స్కాన్ చేసి సెకన్లలో కొలతలు తీసిస్తున్నారు.
"మేము ఈ స్కానర్ను రూపొందించడానికి కారణం.. మాకు చాలామంది కస్టమర్ల నుంచి సూచనలు వచ్చాయి. వారు సేల్స్ సిబ్బందితో లోదుస్తుల కొలతల విషయంలో చర్చించే క్రమంలో ఇబ్బందులు ఎదురవుతున్నాయని, అలాగే వాటిని ధరించేటప్పుడు సరిగ్గా సరిపోయే విధంగా ఉండాలని కోరుకున్నారు."
-చీజా మినామి, త్రీడీ స్మార్ట్ & ట్రై బోధకుడు
స్టోర్కు వచ్చే వినియోగదారులకు ఎలాంటి అభద్రతాభావం, ఇబ్బంది కలగకుండా జాగ్రత్తలు తీసుకున్నట్లు నిర్వాహకులు తెలిపారు. స్కానింగ్ సమయంలో శరీరాన్ని ఎవరూ చూడలేరు. స్కానింగ్ ప్రారంభంలో స్క్రీన్ మీద ఉన్న నియమాలను పాటించాలి. ఆ సమయంలో పక్కన ఉన్న బార్ను చేత్తో పట్టుకుని నిలబడితే చుట్టూ ఉన్న కెమెరాలు కొలతలు తీసుకుంటాయి.
స్కానింగ్ అయిపోయాక వినియోగదారులు 'ఫురేరు చాన్' అనే కృత్రిమ మేథను కానీ, స్టోర్లోని సలహాదారున్ని గానీ సంప్రదించి.. సరిపడే లోదుస్తులను ఎంపిక చేసుకోవచ్చు. ఇక్కడ మీ కొలతలను ప్రింట్ అవుట్ కూడా తీసుకోవచ్చు. స్కానింగ్ పద్దతి వచ్చిన తొలి 24 రోజుల్లోనే 1000 మంది కస్టమర్స్ దీన్ని వినియోగించుకున్నారని స్టోర్ యాజమాన్యం తెలిపింది.
ఇదీ చూడండి: నాటు పడవలో పుట్టిన అసోం కృష్ణుడు
