పాకిస్థాన్లోని బలూచిస్థాన్లో బస్సులో ప్రయాణిస్తున్న 14 మందిని కాల్చి చంపారు దుండగులు. పారా మిలటరీ బలగాల దుస్తుల్లో దాదాపు 15 నుంచి 20 మంది గుర్తుతెలియని దుండగులు ఈ ఘాతుకానికి ఒడిగట్టారు. కరాచీ నుంచి గ్వాడార్ వెళ్తున్న ఆరు బస్సుల్లో తనిఖీలు నిర్వహించారు. బలూచిస్థాన్ ఓర్మారా ప్రాంతంలోని మాక్రన్ కోస్టల్ హైవేపై ప్రయాణికుల ధ్రువీకరణ పత్రాలు పరిశీలించారు. అనంతరం 16 మందిని కిందకు దింపేశారు. 14 మందిని అక్కడికక్కడే తుపాకీతో కాల్చి చంపారు. మరో ఇద్దరు ఈ మారణహోమం నుంచి తప్పించుకుని సమీపంలోని లెవీస్ చెక్పోస్ట్కు చేరుకోగలిగారు. వారిరువురికి ఆసుపత్రిలో వైద్యం అందిస్తున్నారు అధికారులు.
సమాచారం అందుకున్న వెంటనే లెవీస్ చెక్పోస్ట్ అధికారులు ఘటనా స్థలానికి చేరుకుని బాధితుల మృతదేహాలను స్వాధీనం చేసుకున్నారు. కేసు నమోదు చేసి దర్యాప్తు కొనసాగిస్తున్నారు. ప్రయాణికుల ధ్రువీకరణ పత్రాల పరిశీలన, వారిని చంపడం వెనకున్న ఆంతర్యం ఇంకా తెలియలేదని చెప్పారు.
బలూచిస్థాన్ ముఖ్యమంత్రి జామ్ కమాల్, హోంమంత్రి జియా లాంగోవ్ దుండగుల చర్యను తీవ్రంగా ఖండించారు. నిందితులను పట్టుకునేందుకు అన్ని చర్యలూ తీసుకుంటామని ప్రకటించారు.
ఇదీ చూడండి : భాజపా ఎంపీ జీవీఎల్పై 'షూ'తో దాడి