హెచ్1బీ సహా నాన్ ఇమ్మిగ్రేషన్ వీసాలను నిలిపివేస్తూ అమెరికా ప్రభుత్వం తీసుకున్న నిర్ణయాన్ని సవాల్ చేస్తూ అమెరికాకు చెందిన ఐదు వర్తక సంఘాలు కోర్టులో వ్యాజ్యం దాఖలు చేశాయి. నాన్ ఇమ్మిగ్రెంట్ ఉద్యోగులకు వీసాలు నిరాకరించడం వల్ల అమెరికా వ్యాపారులకు ప్రతిభావంతుల కొరత ఏర్పడుతుందని వ్యాజ్యంలో పేర్కొన్నాయి. ప్రతిభావంతుల కోసం పోటీ పడుతున్న ప్రస్తుత మార్కెట్లో ఈ నిర్ణయం ప్రతికూల ప్రభావం చూపుతుందని నివేదించాయి.
యూఎస్ ఛాంబర్ ఆఫ్ కామర్స్, నేషనల్ అసోసియేషన్ ఆఫ్ మానుఫాక్చర్స్, నేషనల్ రిటైల్ ఫెడరేషన్, టెక్నెట్, ఇంట్రాక్స్ అనే వర్తక సంఘాలు సంయుక్తంగా ఈ లా సూట్ దాఖలు చేశాయి.
రద్దు చేయాలి
చట్టవిరుద్ధంగా ఉన్న ఈ ఇమ్మిగ్రేషన్ నిబంధనలను రద్దు చేయాలని పిటిషనర్లు కోరారు. ఈ నిబంధనలు అమెరికా ఆర్థిక వ్యవస్థపై ప్రతికూల ప్రభావాన్ని చూపిస్తాయని అన్నారు.
"అమెరికన్ ఆర్థిక వ్యవస్థను నడిపించడంలో సహాయపడే ఇంజినీర్లు, ఐటీ నిపుణులు, వైద్యులు, నర్సులు ఇతర కార్మికులకు ఇది 'స్వాగతించని' సంకేతం. ఈ నిబంధనలు పెట్టుబడులను విదేశాలకు నెట్టివేస్తాయి, ఆర్థిక వృద్ధిని నిరోధిస్తాయి, ఉద్యోగ కల్పనను తగ్గిస్తాయి."
-థామస్ డొనోహూ, యూఎస్ ఛాంబర్ ఆఫ్ కామర్స్ సీఈఓ
ఇది పరిష్కారం కాదు
ఈ నిర్ణయం వల్ల ప్రభావితమైన హెచ్1బీ వీసాలు అమెరికాలోని సంస్థలకు చాలా కీలకమని వ్యాజ్యంలో పేర్కొన్నారు. వీటిని నిలిపివేయడం ప్రస్తుతం ఉన్న నిరుద్యోగ సమస్యకు పరిష్కారం కాదని అభిప్రాయపడింది. ఈ ఉద్యోగులను నియమించుకోలేకపోతే పరిశ్రమలోని వ్యాపారాలకు తీవ్ర అంతరాయం కలుగుతుందని తెలిపింది.
'కోర్టులకు వెళ్లాల్సి వస్తోంది'
చట్టవిరుద్ధమైన ఈ నిబంధన భవిష్యత్తులో అమెరికా ఆర్థిక వ్యవస్థ పునరుద్ధరణను నిరోధిస్తుందని నేషనల్ అసోసియేషన్ ఆఫ్ మ్యానుఫాక్చరర్స్ సీనియర్ వైస్ ప్రెసిడెంట్ లిండా కెల్లీ పేర్కొన్నారు.
"తయారీదారులు, ప్రోగ్రామ్ స్పాన్సర్లు కోర్టులకు వెళ్తున్నారు. ఎందుకంటే చట్టం హద్దులు మీరే విధంగా ఈ నిబంధనలు ఉన్నాయి. ఇది పరిశ్రమకు తీవ్ర విఘాతం కలిగిస్తుంది. ఇలా జరగడాన్ని మేం అనుమతించలేం. ఆర్థిక వ్యవస్థ పునరుద్ధరణపై పరిశ్రమ దృష్టిసారించాల్సింది. ఈ వీసా నిబంధనల వల్ల ప్రతిభావంతులు అమెరికాను విడిచి వెళ్తారు. కాబట్టి ఇతర దేశాలకు ప్రయోజనం కలుగుతుంది."
-లిండా కెల్లీ, అసోసియేషన్ ఆఫ్ మ్యానుఫాక్చరర్స్ సీనియర్ వైస్ ప్రెసిడెంట్
ఇదీ చదవండి- 'అయోధ్య భూమిపూజకు ఆ నిందితుల్ని ఆహ్వానించాలి'
