ప్రపంచవ్యాప్తంగా 4లక్షల 60వేల మందికిపైగా ప్రాణాలను బలిగొని.. 89లక్షల మందిని అనారోగ్యానికి గురిచేసిన కరోనా మహమ్మారి వ్యాప్తికి చైనానే కారణమని మరోమారు ఆరోపించారు అమెరికా అధ్యక్షుడు డొనాల్డ్ ట్రంప్. కరోనా వైరస్ను చైనీస్ యుద్ధ కళతో పోల్చుతూ 'కుంగ్ ఫ్లూ'గా అభివర్ణించారు.
అగ్రరాజ్యంలో కరోనా విజృంభణ తర్వాత ఒక్లహోమాలోని టల్సాలో నిర్వహించిన తొలి ఎన్నికల ర్యాలీలో ప్రసంగిస్తూ ఈ వ్యాఖ్యలు చేశారు ట్రంప్.
" కరోనాను కుంగ్ ఫ్లూ అని పిలుస్తా. మరో 19 రకాల పేర్లు కూడా పెట్టగలను. చాలా మంది దాన్ని వైరస్ అని, ఫ్లూ అని పిలుస్తున్నారు. తేడా ఏముంది? దానికి 20 రకాల పేర్లున్నాయి. "
-ఎన్నికల ర్యాలీలో డొనాల్డ్ ట్రంప్.
కరోనా వైరస్ చైనాలోని వుహాన్లోనే ఉద్భవించిందని మొదట్నుంచి ఆరోపిస్తున్నారు ట్రంప్. వైరస్ వ్యాప్తి డిసెంబరుకు ముందే మొదలైనప్పటికీ ప్రపంచానికి తెలియకుండా చైనా దాచిందని చాలా సార్లు చెప్పారు. కరోనాను చైనీస్ వైరస్, వుహాన్ వైరస్ అని రకరకాల పేర్లతో పిలిచారు.
కరోనా కారణంగా అమెరికానే అత్యంత తీవ్రంగా ప్రభావితమైంది. ఇప్పటివరకు ఆ దేశంలో 23లక్షల మందికి వైగా వైరస్ బారినపడ్డారు. లక్షా 21వేల మందికిపైగా ప్రాణాలు కోల్పోయారు.
నవంబరులో జరిగే అమెరికా అధ్యక్ష ఎన్నికల్లో మరోసారి గెలవాలనే తాపత్రయంతో ఉన్నారు ట్రంప్. అమెరికా మాజీ ఉపాధ్యక్షుడు, డెమొక్రాటిక్ పార్టీ అభ్యర్థి జో బిడెన్ నుంచి గట్టి పోటీ ఎదుర్కోనున్నారు. కరోనా ప్రభావం, నల్ల జాతీయుడు జార్జి ఫ్లాయిడ్ మృతి, నిరుద్యోగం వంటి ప్రధాన అంశాలు ఈ ఎన్నికలను ప్రభావితం చేయనున్నాయి.
