అమెరికాలోని పర్డ్యూ విశ్వవిద్యాలయానికి చెందిన శాస్త్రవేత్తలు.. ప్రపంచంలోనే అత్యంత తెల్లని పెయింట్ను సృష్టించారు. ఇది వాతావరణ సంక్షోభంపై పోరాటానికి ఉపయోగపడుతుందని అంటున్నారు.
ఈ పెయింట్ను వర్సిటీలోని మెకానికల్ ఇంజినీరింగ్ ప్రొఫెసర్ జులిన్ రువాన్, కొందరు విద్యార్థులు సృష్టించారు. 'రేడియేటివ్ కూలింగ్' పద్ధతితో ఈ పెయింట్ పనిచేస్తుంది. ఇందులోని 'పాసివ్ కూలింగ్' సాంకేతికత.. భూతాపాన్ని తగ్గించేందుకు ఉపయోగపడుతుంది.
ఏడేళ్ల ముందు ఈ ప్రాజెక్టును మొదలుపెట్టినప్పుడు.. వాతావరణ మార్పులపై దృష్టిసారించాలని నిర్ణయించుకున్నట్టు రువాన్ తెలిపారు. సూర్యరశ్మి భవనాలను తాకినప్పుడు, లోపలకు వేడి చేరకుండా.. బయటకే అది ప్రతిబింబించే విధంగా పెయింట్ను సృష్టించాలని అనుకున్నట్టు వెల్లడించారు. దీని వల్ల భవనంలో ఉష్ణోగ్రతలు తగ్గుతాయని, తద్వారా ఏసీల వినియోగం తగ్గుతుందన్నారు.
"తెల్ల పెయింట్.. ఇన్ఫ్రారెడ్ హీట్ను విడుదల చేస్తుంది. అందువల్ల సోలార్ రేడియేషన్ను 98.1శాతం ప్రతిబింబిస్తుంది. ఫొటో పేపర్, కాస్మొటిక్స్లో ఉపయోగించే బేరియం సల్ఫేట్తో దీనిని రూపొందించాం. సాధారణ తెల్ల పెయింట్.. బయటి ఉష్ణోగ్రతలతో వెంటనే వేడెక్కుతుంది. కానీ ఈ పెయింట్కు వేడిని గ్రహించే శక్తి ఉండటం వల్ల చుట్టుపక్కన కన్నా ఉష్ణోగ్రతలు తగ్గుతాయి. 1,000 చదరపు అడుగుల్లో 10కిలోవాట్ల కూలింగ్ శక్తిని ఇది ఉత్పత్తి చేస్తుంది. అంటే ఏసీల కన్నా ఇది ఎంతో శక్తిమంతమైనది."
-- రువాన్, పర్డ్యూ వర్సిటీ ప్రొఫెసర్.
ఇంట్లో ఏసీ వంటి వస్తువుల వినియోగాన్ని తగ్గిస్తే.. వాతావరణానికి మేలు చేకూరుతుంది. ఈ పెయింట్ను మార్కెట్లోకి తీసుకొచ్చేందుకు వర్సిటీ ప్రయత్నాలు మొదలుపెట్టింది. ఇప్పటికే ఓ కంపెనీతో భాగస్వామ్యం కోసం చర్చలు జరుపుతోంది.
ఇదీ చూడండి:- Global Warming: భూమాతకు జ్వరమొస్తే అన్నీ ఉత్పాతాలే
