అమెరికా గ్రీన్కార్డు జారీ ప్రక్రియ మధ్యలోనే ఆగిపోయి ఇబ్బందులు ఎదుర్కొంటున్న వేల మందికి త్వరలోనే ఉపశమనం లభించనుంది. కొత్త ఇమ్మిగ్రేషన్ బిల్లు చట్టరూపం దాల్చితే అనేకమంది భారతీయుల సహా ఇతర దేశాల వారికి శాశ్వతంగా అగ్రరాజ్యంలోనే నివసించే వెసులుబాటు కలగనుంది. అయితే ఈ గ్రీన్కార్డు లభించాలంటే వారు 5000 డాలర్ల వరకు అదనపు రుసుం చెల్లించాల్సి ఉంటుంది.
ఈ బిల్లును అమెరికా ఉద్దీపన ప్యాకేజీలో చేర్చి చట్టంగా మార్చితే వేలాది మంది భారతీయ ఐటీ నిపుణుల గ్రీన్కార్డ్ బ్యాగ్లాగ్ల సమస్య తీరిపోనుంది. అమెరికాలో శాశ్వత నివాస ధ్రువపత్రమైన గ్రీన్ కార్డు కోసం వారు ఏళ్ల తరబడి ఎదురుచూస్తున్నారు.
- అమెరికా ప్రతినిధుల సభ జ్యుడీషియరీ కమిటీ విడుదల చేసిన ఈ బిల్లు కాపీ ప్రకారం.. ఉపాధి ఆధారిత ఇమ్మిగ్రెంట్ దరఖాస్తుదారు ప్రాధాన్య తేదీ కంటే రెండు సంవత్సరాల ముందుగానే 5000 డాలర్లు అదనపు రుసుం చెల్లించడం ద్వారా సంఖ్యా పరిమితులు లేకుండా శాశ్వత నివాసానికి మార్గం సుగమం చేసుకోవచ్చు.
- ఈబీ-5 కేటగిరీ(వలస పెట్టబడిదారులు)కి దరఖాస్తు చేసుకునేవారు అదనపు రుసుం 5000 డాలర్లు చెల్లించాల్సి ఉంటుంది.
- కుటుంబ ఆధారిత వలసదారులు గ్రీన్కార్డు పొందేందుకు 2500 డాలర్లు అదనపు రుసుం చెల్లించాలి.
- ప్రాధాన్య తేదీ రెండేళ్లలోపు లేని వారు 1500 డాలర్లు అదనపు రుసుం చెల్లించి గ్రీన్కార్డు పొందవచ్చు. దరాఖాస్తుకు చెల్లించే సాధారణ రుసుముకు ఉది అదనం.
అయితే ఇమ్మిగ్రేషన్ వ్యవస్థలో శాశ్వత నిర్మాణాత్మక మార్పులకు సంబంధించిన ప్రతిపాదనలు బిల్లులో లేవు. గ్రీన్ కార్డుల కోసం దేశ పరిమితులను ఎత్తివేయడం, లేదా హెచ్1బీ వీసాల వార్షిక కోటాలను పెంచడం వంటి వాటిని కూడా ప్రస్తావించలేదు. ఈ బిల్లు చట్టరూపం దాల్చడానికి ముందు జ్యుడీషియరీ కమిటీ, ప్రతినిధుల సభ, సెనేట్ ఆమోదించాలి. అనంతరం అధ్యక్షుడు బైడెన్ బిల్లుపై సంతకం చేయాలి.
ఇది చట్టంగా మారితే అమెరికాకు చిన్నవయసులో వచ్చినవారు, తాత్కాలికంగా రక్షణ పొందినవారు, వ్యవసాయ కూలీలు, ఇతర కార్మికులు, శాశ్వత నివాసం కోసం దరఖాస్తు చేసుకోవచ్చని సీబీఎస్ న్యూస్ తెలిపింది.
ఇదీ చదవండి: కొత్త ట్విస్ట్.. చైనా-పాక్తో కలిసి భారత యుద్ధ విన్యాసాలు!
