సీన్ లెనాన్(47) అనే వ్యక్తి అమెరికాలోని న్యూజెర్సీ పోలీసులకు షాకిచ్చాడు. ఓ వ్యక్తిని అతికిరాతకంగా కొట్టి చంపాడని పోలీసులు అతడిని అరెస్టు చేస్తే.. తాను ఏకంగా 16 హత్యలు చేశాడని చెప్పాడు.
మార్చి 8న..
న్యూజెర్సీకి చెందిన మైకేల్ డబ్కౌస్కీ (66)ని లెనాన్ సుత్తితో కొట్టి దారుణంగా హత్య చేశాడు. ఆ తర్వాత మైకేల్ కారుతో పరారయ్యాడు. రెండు రోజుల తర్వాత మార్చి 10న మిస్సోరిలోని సెయింట్ లూయిస్ ప్రాంతంలో పోలీసులు లెనాన్ను అరెస్టు చేశారు. డబ్కౌస్కీ తనను చిన్నతనంలో లైంగికంగా వేధించినందువల్లే ఈ హత్య చేసినట్లు విచారణలో పోలీసులకు తెలిపాడు. ఇప్పటికే తాను మరో 15 మందిని హత్య చేశాడని ఒప్పుకున్నాడు. మృతుల్లో తన భార్య కూడా ఉందని వెల్లడించాడు.
అనుమానం వచ్చినా...
మార్చి 5న న్యూమెక్సికోలోని అల్బుకర్క్యూ అంతర్జాతీయ విమానాశ్రయం వద్ద లెనాన్ మాజీ భార్య సహా ముగ్గురి మృతదేహాలు కారులో దొరికాయి. పోలీసులకు తొలుత లెనాన్పై అనుమానం వచ్చినా సరైన ఆధారాలు లేని కారణంగా అతనిపై ఎలాంటి చర్యలు తీసుకోలేదు. అనూహ్యంగా మైకేల్ హత్య కేసులో పట్టుబడిన లెనాన్... అసలు విషయం వెల్లడించాడు.
అయితే... లెనాన్ 16 హత్యలు చేశాడని పోలీసులు ఇంకా ధ్రువీకరించలేదు. దర్యాప్తు పూర్తయ్యాకే అసలు విషయం తెలుస్తుందని చెప్పారు.
ఇదీ చదవండి:సిరియాలో పేలుడు- ఇద్దరు మృతి
