మనకు ఆరోగ్యం బాగాలేకపోతే ఏం చేస్తాం? బయటకు వెళ్లం. స్నేహితులను కలవం. ప్రస్తుత కరోనా సమయంలో అయితే అనారోగ్యంగా ఉన్నవారికి ఆమడ దూరంలో ఉంటాం. మనకే ఇబ్బంది ఎదురైతే సెల్ఫ్ ఐసోలేషన్లోకి వెళ్తాం. సరిగ్గా గబ్బిలాలు కూడా మనుషుల్లాగే చేస్తాయని అమెరికా పరిశోధకులు తెలిపారు. దీనిపై అధ్యయనం చేసి ఈ విషయాలను ధ్రువీకరించారు.
సెంట్రల్ అమెరికాలోని ఓ శాస్త్రవేత్తల బృందం గబ్బిలాలు నివాసం ఉండే ప్రాంతానికి వెళ్లింది. వాటిలో కొన్నింటిని వల వేసి పట్టుకున్నారు బృందంలోని సభ్యులు. ఆ తర్వాత వాటిలో సగం గబ్బిలాలకు సాధారణ సెలైన్ ఇచ్చారు. మిగతా వాటికి అనారోగ్యమయ్యేలా కెమికల్ లిపోపాలీసచరైడ్(ఎల్పీఎస్) ఇచ్చారు. ఆ తర్వాత వాటికి సెన్సార్లు అమర్చి వాటి నివాసంలోనే వదిలేశారు.
స్నేహితులకు దూరంగా..
అనంతరం గబ్బిలాల కదలికలను పర్యవేక్షించారు పరిశోధకులు. వీటిలో సెలైన్ ఇచ్చిన గబ్బిలాలు ఎప్పటిలానే స్నేహితులతో కలిసి హాయిగా గడిపాయి. కానీ ఎల్పీఎస్ కారణంగా అనారోగ్యానికి గురైనవి మాత్రం తమ వారిని కలవలేదు. స్వతహాగా ఇతరులకు దూరం పాటించాయి. ఆరోగ్యంగా ఉన్న గబ్బిలాలు కూడా వాటి దగ్గరకు వెళ్లలేదు.
గబ్బిలాలకు సెన్సార్లు అమర్చి వదిలిన 6 గంటల తర్వాత పరిశోధకులు ఈ విషయాలు కనుగొన్నారు. మనుషుల్లానే గబ్బిలాలు కూడా సామాజిక జీవులని తెలిపారు. ఈ అధ్యయనం భవిష్యత్తులో జంతువులపై జరిపే ప్రయోగాలకు ఉపయోగపడుతుందని చెప్పారు.
