జో బైడెన్.. అమెరికా అధ్యక్ష ఎన్నికల్లో డొనాల్డ్ ట్రంప్కు ప్రత్యర్థి. ఈయన 1972లో యూఎస్ సెనేటర్గా ఎంపికయ్యారు. అత్యంత పిన్నవయసులోనే ఈ పదవి చేపట్టి రికార్డు సృష్టించారు. అయితే ఆ సమయంలో బైడెన్ను అభినందిస్తూ ముంబయి నుంచి ఓ లేఖ వచ్చిందట. అది పంపిన వ్యక్తి పేరు చివరన బైడెన్ ఉండటం విశేషం. అంతేకాదు 'ముంబయి బైడెన్' పంపిన లేఖలో డెలావేర్ సెనేటర్గా బైడెన్ ఎంపికైనందుకు అభినందనలు చెప్తూనే.. ఇద్దరికి సంబంధం ఉందని అందులో పేర్కొన్నారట.
29 ఏళ్ల వయసున్న సెనేటర్ బైడెన్.. ఆ సమయంలోనే లేఖ రాసిన 'ముంబయి బైడెన్'ను కలవాలనుకున్నారట. అయితే కుటుంబం సహా తాను రాజకీయాల్లో బిజీ అవడం వల్ల కుదరలేదని చెప్పారు. ఆ తర్వాత పలు వేదికలపై ఆ స్టోరీలను పంచుకున్నారు.
స్టోరీలు చెప్తూనే..
భారతీయ-అమెరికన్లు, భారతీయ రాజకీయ నేతలను కలిసిన ప్రతిసారి 'ముంబయి బైడెన్' కథ చెప్తూనే ఉండేవారట జో బైడెన్.
2013, జులై 24న ముంబయిలోని బాంబే స్టాక్ ఎక్స్చేంజీని అమెరికా ఉపాధ్యక్షుడి హోదాలో సందర్శించారు బైడెన్. ఆ సమయంలో 'ముంబయి బైడెన్' స్టోరీని కార్యక్రమంలోని ప్రేక్షకులతో పంచుకున్నారు.
"భారత్లోని ముంబయికి రావడం గౌరవంగా భావిస్తున్నా. ఇక్కడ ఓ విషయం చెప్పాలి. నాకు బాగా గుర్తుంది. నేను 29 ఏళ్ల వయసులో 1972లో యూఎస్ సెనేట్గా ఎంపికయ్యాను. అయితే ఆ సమయంలో ఓ లేఖ అందుకున్నాను. కానీ నేను దాన్ని ఫాలోఅప్ చేయలేకపోయాను. ఎవరైనా వంశావళి గురించి అధ్యయనం చేస్తున్నవారు ఆడియన్స్లో ఉంటే నాకోసం వారిని ఫాలో అప్ చేయాలి. బైడెన్ అనే పేరుతో ఆ లేఖ ముంబయి నుంచి వచ్చింది. కచ్చితంగా ఆ వ్యక్తితో నాకు ఏదో అనుబంధం ఉందని అనుకుంటున్నా. 1700 సంవత్సరంలో ఈస్ట్ ఇండియా ట్రేడింగ్ కంపెనీ కోసం మా పూర్వీకులు ముంబయికి వచ్చారు."
-బైడెన్
పోటీచేస్తున్నానంటూ నవ్వించారు..
"నేను దాని గురించి ఇప్పటికీ ఆలోచిస్తున్నాను. అది నిజమైతే నేను భారత్లో ఆఫీస్ పెట్టుకోవచ్చు. భారతదేశంలో ఎన్నికల్లో పోటీ చేయడానికి నేను అర్హత పొందవచ్చు. కానీ నేను అప్పుడు ముంబయి నుంచి వచ్చిన ఆ లేఖను సరిగ్గా పట్టించుకోలేదు. కానీ ఇప్పుడు నేను చాలాసార్లు తిరిగి వచ్చాను. 'ముంబయి బైడెన్'తో నాకు సంబంధం ఉందా అని తెలుసుకోవడానికి చాలా ప్రయత్నిస్తున్నాను. ఇప్పుడు అతడు ఉంటే మంచి స్థితిలో ఉంటాడని నేను నమ్ముతున్నాను" అని బైడెన్ 2013లో ముంబయిలోని కార్యక్రమంలో మాట్లాడుతూ సరదాగా ఆ సందర్భాన్ని గుర్తుచేసుకున్నారు.
మరోసారి...
వాషింగ్టన్లో జరిగిన ఓ కార్యక్రమంలోనూ దీనిని ప్రస్తావించారు బైడెన్. తన పూర్వీకులకు, ముంబయిలోని బైడెన్ పూర్వీకులకు సంబంధం ఉందని అభిప్రాయపడ్డారు. ఈస్ట్ ఇండియా కంపెనీలో పనిచేసేందుకే వాళ్లు ముంబయికి వెళ్లారని అన్నారు.
"ముంబయి బైడెన్ 1848లో ముంబయికి వెళ్లారు. ఈస్ట్ ఇండియా టీ కంపెనీలో పనిచేస్తున్నప్పుడు భారతీయ మహిళను పెళ్లి చేసుకున్నారు. భారత్లోనే స్థిరపడ్డారు" అని యూఎస్-ఇండియా బిజినెస్ కౌన్సిల్ సమావేశంలో చెప్పారు అధ్యక్ష అభ్యర్థి బైడెన్. ఈ కార్యక్రమం 2015, సెప్టెంబర్ 21న జరిగింది.
అయితే ముంబయిలో ప్రసంగం తర్వాత ఓ జర్నలిస్టు ఐదుగురు బైడెన్లు ముంబయిలో ఉంటున్నారని ఓ జాబితా తనకు అందజేసినట్లు వాషింగ్టన్ డీసీ ఈవెంట్లో బైడెన్ చెప్పుకొచ్చారు. "కాబట్టి, నాపట్ల మరింత ఆదరణ చూపించండి" అంటూ భారతీయులతో తన బంధాన్ని నొక్కిచెప్పారు జో బైడెన్.
