ఆర్థిక వ్యవస్థలను తిరిగి ప్రారంభించాలని భావిస్తున్న ప్రపంచ దేశాల అధినేతలను కరోనా ఉద్ధృతి తీరు కలవరపెడుతోంది. చాలా దేశాల్లో రోజురోజుకూ కేసుల సంఖ్య పెరుగుతుండడమే ఇందుకు కారణం. ప్రపంచవ్యాప్తంగా కరోనా సోకినవారి సంఖ్య 59లక్షలు దాటగా, మృతుల సంఖ్య 3.62లక్షలకు ఎగబాకింది.
అమెరికా, రష్యా, బ్రెజిల్, మెక్సికో సహా ప్రపంచవ్యాప్తంగా పలు దేశాల్లో ప్రతిరోజు వేలమందిని తన విషపు కౌగిలి బాధితుల జాబితాలో చేర్చుకుంటోంది కొవిడ్-19. కాస్త తేరుకున్నట్లే కనిపించిన దక్షిణ కొరియాలో కేసులు మళ్లీ పెరుగుతుండటమూ ఆందోళన కలిగిస్తోంది. బ్రిటన్, ఇటలీ, ఫ్రాన్స్‌, జర్మనీ,కెనడా దేశాల్లో రోజూ వందల సంఖ్యలో పాజిటివ్‌ కేసులు నమోదవుతున్నాయి. టర్కీ, ఇరాన్‌, చిలీ దేశాల్లో పదుల సంఖ్యలో వైరస్ బారిన పడుతున్నారు. పాకిస్థాన్‌లో మొత్తం బాధితుల సంఖ్య 61 వేల 277కు చేరింది. మృతుల సంఖ్య 12 వందల 60కి ఎగబాకింది. బంగ్లాదేశ్‌లో కేసులు 40 వేల 321కి పెరగ్గా...ఇప్పటివరకు 559 మంది చనిపోయారు.
రెండోస్థానంలో బ్రెజిల్
ఇతర దేశాలతో పోలిస్తే ప్రస్తుతం బ్రెజిల్‌లో వైరస్ ఉద్ధృతి ఎక్కువగా ఉంది. అక్కడ సగటున రోజుకు 800 మందికిపైగా మృత్యువాతపడుతున్నారు. గడిచిన 24 గంటల్లో 24వేల మందికిపైగా కరోనా బారిన పడ్డారు. వీటితో కలిపి అక్కడ మొత్తం కేసుల సంఖ్య 4,38,812కు చేరింది. ప్రపంచవ్యాప్తంగా అత్యధిక కేసుల జాబితాలో ప్రస్తుతం రెండో స్థానంలో నిలిచింది.
రష్యాలో తాజాగా 24 గంటల్లో 8,371 మందికి వైరస్ సోకింది. 174 మంది మరణించారు. వీటితో కలిపి రష్యాలో మొత్తం కేసులు 3,79,051కి చేరాయి. చిలీలో దాదాపుగా ప్రతిరోజు నాలుగు వేలకుపైగా కేసులు వెలుగుచూస్తున్నాయి.
ఇదీ చూడండి : 'గొడవ పడితే అమెరికా-చైనాలే నష్టపోతాయి'
