తెలుగు చిత్ర పరిశ్రమలో శ్రీవెంకటేశ్వర క్రియేషన్స్ బ్యానర్‌కు, ఆ సంస్థ అధినేత దిల్రాజుకు ప్రత్యేకమైన గుర్తింపు ఉంది. దిల్రాజు కాంపౌండ్‌ నుంచి కొత్త సినిమా వస్తుందంటే.. హీరో, హీరోయిన్‌ ఎవరనేది చూడకుండా థియేటర్స్‌కు వస్తున్నారు సినీ ప్రియులు! డిస్ట్రిబ్యూటర్‌గా కెరీర్ ప్రారంభించిన దిల్ రాజు.. దిల్ సినిమాతో నిర్మాతగా మారారు. 20 ఏళ్ల క్రితం (2003, ఏప్రిల్‌ 4) దిల్ సినిమా విడుదలై ప్రేక్షకుల మనసులు గెలుచుకుంది. ఆ తర్వాత నుంచి వరుసగా తన సంస్థ శ్రీ వెంకటేశ్వర క్రియేషన్స్పై సినిమాలు నిర్మిస్తూ కెరీర్లో ఎన్నో బ్లాక్ బస్టర్ సక్సెస్లను అందుకుని గోల్డెన్ లెగ్ నిర్మాతగా మంచి పేరు దక్కించుకున్నారు దిల్ రాజు. 20 ఏళ్లతో 50 చిత్రాలను నిర్మించి అత్యధిక సక్సెస్ రేటు సాధించారు.
అయితే దిల్రాజు.. ట్విట్టర్లో ఫ్యాన్స్తో తాజాగా చిట్ చాట్ నిర్వహించారు. ఈ సందర్భంగా పలు ఆసక్తికర ప్రశ్నలకు సమధానాలిచ్చారు. ముఖ్యంగా దిల్రాజు తన డ్రీమ్ ప్రాజెక్ట్ గురించి వివరించారు. జటాయు పేరుతో భారీ సినిమా ప్లాన్ చేస్తున్నట్లు తెలిపారు. అత్యుత్తమ సాంకేతిక సిబ్బంది, ఫేమస్ నటీనటులతో సినిమాను తెరకెక్కించేందుకు ప్రణాళికను రూపొందిస్తున్నట్లు వెల్లడించారు. ఈ విషయం తెలుసుకున్న ఫ్యాన్స్ చాలా హ్యాపీగా ఫీలవుతున్నారు. వెయింటింగ్ అంటూ నెట్టింట ట్రెండ్ చేస్తున్నారు.
రామ్చరణ్ హీరోగా తెరకెక్కిస్తున్న గేమ్ఛేంజర్ సినిమా.. ఫ్యాన్స్తో పాటు అందరికీ నచ్చేలా ఉంటుందని తెలిపారు. మరో ప్రశ్నలో నటసింహం బాలకృష్ణతో సినిమా తీయాలని ఉందంటూ తన మనసులోని మాటను బయటపెట్టారు. ప్రభాస్, ఎన్టీఆర్, నాని, రవితేజ, యశ్లతో చిత్రాలను భవిష్యత్తులో తీయబోతున్నట్లు హింట్ ఇచ్చారు. తనకు బొమ్మరిల్లు చిత్రం అంటే చాలా ఇష్టమని తెలిపారు. శాకుంతలం చిత్రంలో సమంత అద్భుతంగా నటించినట్లు చెప్పారు.
టాలీవుడ్ సినీ ఇండస్ట్రీకి ఎంతో మంది దర్శకులను పరిచయం చేశారు దిల్రాజు. 2004లో ఆర్య సినిమాతో సుకుమార్‌ను పరిచయం చేశారు. 2006లో వచ్చిన బొమ్మరిల్లు సినిమా ఎలాంటి విజయాన్ని అందుకుందో ప్రత్యేకంగా చెప్పనవసరం లేదు. ఆ సినిమాతోనే భాస్కర్ దర్శకుడిగా ఇండస్ట్రీకి పరిచయమయ్యారు. మున్నా సినిమాతో వంశీ పైడిపల్లిని, కొత్త బంగారులోకం సినిమా ద్వారా శ్రీకాంత్ అడ్డాలను టాలీవుడ్‌కు అందించారు.
వారిసు చిత్రంతో కోలీవుడ్లోనూ ఎంట్రీ ఇచ్చారు దిల్రాజు. విజయ్‌ హీరోగా నటించిన ఆ చిత్రం.. ఈ ఏడాది సంక్రాంతికి విడుదలై హిట్‌ కొట్టింది. ప్రస్తుతం శంకర్‌ దర్శకత్వంలో రామ్ చరణ్ హీరోగా పాన్‌ ఇండియా సినిమాను నిర్మిస్తున్నారు. 20 ఏళ్ల జర్నీలో దిల్రాజు ఎన్నో అవార్డులను పొందారు. శతమానం భవతితో జాతీయ స్థాయి అవార్డు అందుకున్నారు. బలగంతో అంతర్జాతీయ అవార్డును గెలుచుకున్నారు.
