Fake Passport Gang Arrest: నకిలీ పాస్పోర్ట్, వీసాలతో అమాయక ప్రజలను మోసం చేస్తున్న ఓ ముఠాను హైదరాబాద్ అబిడ్స్ పోలీసులు అరెస్టు చేశారు. వాహబ్, మహహ్మద్ అబ్దుల్ జాకీ, ముఖీత్లు సభ్యులుగా ఏర్పడి హైదర్ గూడ, బషీర్బాగ్లో టాలెంట్ కెరీర్ గ్రూప్ను ప్రారంభించారు.
దుబాయ్కి ఇమ్మిగ్రేషన్ ప్రాసెస్ కోసం కార్వాన్ కు చెందిన రఫీ అక్టోబర్ 2021లో మహ్మద్ అబ్దుల్ను సంప్రదించాడు. అతని వద్ద 80 వేలు విమాన టిక్కెట్లుతో సహా అతడిని జాబ్ వీసాపై దుబాయ్ ఎక్స్ పోకి పంపుతామని గ్రూప్ నిర్వహకులు డబ్బులు వసూలు చేశారు.
అనంతరం నకిలీ వీసాలు, ఆఫర్ లెటర్లు సృష్టించి ముంబై నుంచి దుబాయ్కి టిక్కెట్లు బుక్ చేసి అతనికి అందించారు. నవంబర్ నెలాఖరులో మహమ్మద్ అబ్దుల్ వైద్య పరీక్షల కోసం రఫీతో పాటు మరో ఐదు మందిని ముంబైకి తీసుకెళ్లాడు. అక్కడ వారికి టూరిస్ట్ వీసాలు ఇప్పించి టూరిస్ట్ వీసాపై దుబాయ్కి పంపారు.
దుబాయ్ విమానాశ్రయంలో సంజు అనే వ్యక్తి కలవాలని తెలిపారు. అక్కడి వెళ్లాక మోసం చేశారని తెలుసుకున్న బాధితులు ఆబిడ్స్ పోలీస్స్టేషన్లో ఫిర్యాదు చేశారు. కేసు నమోదు చేసుకున్న పోలీసులు మహ్మద్ అబ్దుల్ జాకీని అరెస్టు చేశారు. మరో ఇద్దరు నిందితులు పరారీలో ఉన్నారు. నిందితుడి నుంచి ఐదు పాస్ పోర్టులు, రెండు సెల్ఫోన్లు, లాప్ట్యాప్ను పోలీసులు స్వాధీనం చేసుకున్నారు.
ఇదీ చదవండి: పెట్రోల్ బంక్ ఘరానా మోసం.. డీజిల్లో 75 శాతం నీరు..!
