ఉద్యోగుల వేతన సవరణ కోసం రాష్ట్ర ప్రభుత్వం ఇప్పటికే కమిషన్ను ఏర్పాటు చేసింది. విశ్రాంత ఐఏఎస్ అధికారి సీఆర్ బిస్వాల్ నేతృత్వంలో ముగ్గురు సభ్యులను నియమించింది. నెల రోజుల్లోనే నివేదిక సమర్పించాలని ప్రభుత్వం స్పష్టం చేసినా వివిధ కారణాలతో నివేదిక వాయిదా పడుతూ వచ్చింది. 2018 జులై ఒకటి నుంచి నూతన పీఆర్సీ అమలు కావాల్సి ఉంది. వేతన సవరణతో పాటు, ఇతర అంశాలకు సంబంధించిన విధివిధానాలను కూడా పీఆర్సీ కమిషన్కు రాష్ట్ర ప్రభుత్వం అప్పగించింది.
అప్పుడు 43 శాతం ఇప్పడెంత..!
పీఆర్సీ కమిషన్కు నివేదిక సమర్పించినప్పుడు 63 శాతం ఫిట్మెంట్ ఇవ్వాలని మెజార్టీ ఉద్యోగ, ఉపాధ్యాయ సంఘాలు కోరాయి. రాష్ట్ర ఆవిర్భావం తర్వాత ముఖ్యమంత్రి కేసీఆర్.. 43 శాతం ఫిట్మెంట్ ఇచ్చారు. ఈసారి 63 శాతం ఇవ్వాలని ఉద్యోగులు కోరుతున్నారు. తీవ్ర ఆర్థిక మాంద్యం ఉందని రాష్ట్ర ప్రభుత్వం ప్రకటించిన నేపథ్యంలో ఫిట్మెంట్ ఎంత ఇస్తారమన్నది ఆసక్తికరంగా మారింది.
అడిగినంత ఇస్తే రూ.9000 కోట్ల భారం..
ఒక్క శాతం ఫిట్మెంట్ ఇస్తేనే ప్రభుత్వ ఖజానాపై రూ. 339 కోట్ల అదనపు భారం పడుతుందని ఇప్పటికే ఆర్థిక శాఖ అంచనా వేసింది. ఆ లెక్కన 20 శాతం ఫిట్మెంట్ ఇస్తే రూ.6,600 కోట్ల అదనపు భారం పడనుంది. వేతన సవరణ చేస్తే ఇప్పుడున్న మూల వేతనంలో డీఏను కూడా కలపాల్సి ఉంటుంది. ఏడాదికి రెండుసార్లు చొప్పున ఐదేళ్లలో పది డీఏలు వస్తాయి. ఆ మొత్తాన్ని మూలవేతనంలో కలిపి, దానిపై హెచ్ఆర్ఏ సహా ఇతర భత్యాలు లెక్కించాల్సి ఉంటుంది. కేవలం ఈ ప్రక్రియ చేస్తేనే ఖజానాపై రూ.3,000 కోట్ల భారం పడుతుందని ఆర్థిక శాఖ అంచనా వేసింది. అంటే సున్నాశాతం ఫిట్మెంట్ ఇచ్చినా ఖజానాపై రూ.3000 కోట్ల భారం పడుతుంది. 20 శాతం ఫిట్మెంట్ అంటే సుమారు రూ.9,000 కోట్ల భారాన్ని రాష్ట్ర ప్రభుత్వం మోయాల్సి ఉంటుంది.
ఆర్థిక మాంద్యం దృష్ట్యా రాష్ట్ర ప్రభుత్వం పరిధిలో కొత్తగా పనులేవి చేపట్టడం లేదు. పాత బిల్లుల చెల్లింపులకే అధిక ప్రాధాన్యం ఇస్తున్నారు. ఇలాంటి పరిస్థితుల్లో వేతన సవరణ కోసం ప్రభుత్వం ఎంత మేర భరిస్తుందన్నది చూడాల్సి ఉంది. పీఆర్సీ కమిషన్ నివేదిక ఇచ్చాక ఉద్యోగ సంఘాల ప్రతినిధులతో ముఖ్యమంత్రి సమావేశమై వేతన సవరణ ప్రకటించే అవకాశం ఉంది. ఆర్టీసీ సమ్మె వ్యవహారం కొలిక్కి వచ్చాకే పీఆర్సీపై ప్రభుత్వం నిర్ణయం తీసుకునే అవకాశం ఉందని తెలుస్తోంది.
ఇవీచూడండి: స్వరూపం మార్చుకోనున్న ప్రజారవాణా
