పురపాలక ఎన్నికల కోసం వార్డుల వారీ ఓటర్ల జాబితా తయారీకి రాష్ట్ర ఎన్నికల సంఘం మార్గదర్శకాలు విడుదల చేసింది. కొత్త పురపాలక చట్టానికి అనుగుణంగా సిద్ధం చేయాలని ఆదేశించింది. శాసనసభ నియోజకవర్గాల వారీ ఓటర్ల జాబితా ఆధారంగా వార్డుల ఓటర్ల జాబితా తయారీ చేయాలని ఎస్ఈసీ సూచించింది. ఈ బాధ్యతను కార్పోరేషన్లు, మున్సిపాల్టీల్లో కమిషనర్లకు, జీహెచ్ఎంసీలో డిప్యూటీ కమిషనర్లకు అప్పగించింది.
తొలగింపులు, చేర్పులు చేయరాదు..
రాష్ట్ర ఎన్నికలసంఘం రూపొందించిన టీఈ పోల్ సాఫ్ట్వేర్ సాయంతో వార్డుల వారీ ఫోటో ఓటర్ల జాబితాలు రూపొందించాలని సూచించింది. తయారీ సమయంలో ఓటర్ల జాబితలో ఎటువంటి తొలగింపులు, చేర్పులు చేయరాదని.. అసెంబ్లీ నియోజకవర్గాల జాబితాలకు భిన్నంగా ఉండరాదని స్పష్టం చేసింది. జాబితాలో ఏవైనా అచ్చుతప్పులు ఉంటే బాధ్యుల దృష్టికి తీసుకెళ్లి సరిచేయాలని, జాబితాలో కులం, మతం వివరాలు పొందుపర్చరాదని ఈసీ పేర్కొంది.
తుది జాబిత - ఈసీ, జిల్లా కలెక్టరేట్ వెబ్సైట్
వార్డుల వారీ ఓటర్ల జాబితా తయారీ ప్రక్రియను జిల్లా కలెక్టర్లు పర్యవేక్షించడంతో పాటు నోడల్, ప్రత్యేకాధికారులను నియమించాలని ఆదేశించింది. పూర్తి స్థాయిలో వార్డుల వారీ ఓటర్ జాబితా సిద్ధమయ్యాక ఫోటోలు లేకుండా వాటిని రాష్ట్ర ఎన్నికల సంఘం, జిల్లా కలెక్టరేట్ వెబ్సైట్లో పొందుపర్చాలని తెలిపింది.
కార్పోరేషన్లు, మున్సిపల్ ఎన్నికలు - అభ్యర్థుల వ్యయపరిమితి
- జీహెచ్ఎంసీ కార్పోరేటర్గా పోటీ చేసే అభ్యర్థి ఐదు లక్షల వరకు ఖర్చు చేయవచ్చు.
- ఇతర కార్పోరేషన్లలో కార్పోరేటర్గా పోటీచేసే అభ్యర్థి గరిష్ట వ్యయపరిమితి లక్షా యాభై వేల రూపాయలు.
- మున్సిపల్ కౌన్సిలర్గా పోటీ చేసే అభ్యర్థి లక్ష రూపాయల వరకు ఖర్చు చేయవచ్చు.
