తిండి కోసం తిప్పలు.. చెట్ల కిందే పడిగాపులు
మెడికల్‌ హబ్‌గా ప్రసిద్ధిగాంచిన హైదరాబాద్‌కు వైద్యం కోసం చుట్టుపక్కల ప్రాంతాలతోపాటు వివిధ రాష్ట్రాల నుంచి చికిత్స కోసం వస్తుంటారు. వాళ్లతో పాటు వచ్చే సహాయకులు చేదోడుగా ఉంటారు. అలా వచ్చే సహాయకుల్లో పేదవాళ్లు.. లాక్డౌన్ వల్ల ఇబ్బందులు ఎదుర్కొంటున్నారు. తినేందుకు ఆహారం, నిలువనీడ, తలదాచుకునే స్థలం లేక తీవ్ర అవస్థలు పడుతున్నారు. ఉదయం 10గంటలకే హోటళ్లు మూతపడుతుండగా.. అన్నం కోసం దిక్కులు చూడాల్సిన పరిస్థితులు నెలకొంటున్నాయి. బాధితులకు ఆస్పత్రుల్లోనే భోజనం లభిస్తుండగా.. సహాయకులు కడుపు మాడ్చుకుంటున్నారు. కాస్త చదువు వచ్చి, జేబులో ఎంతోకొంత ఉన్నవాళ్లు ఆన్‌లైన్‌లో ఆహారం తెప్పించుకొని తింటున్నారు. గ్రామీణ ప్రాంతాల వారికి ఇవేమీ తెలియని వాళ్లు.. దాతలపైనే ఆధారపడుతున్నారు.
