కరోనా సంబంధిత వార్తలు, స్థూల ఆర్థిక గణాంకాలు, కంపెనీల త్రైమాసిక ఫలితాలు ఈ వారం మార్కెట్లను ముందుకు నడిపించనున్నాయి.
దేశంలో కరోనా వైరస్ రెండో దశ సునామీలా విరుచుకుపడుతోంది. ఈ నేపథ్యంలో కొత్త కేసులు, టీకా సంబంధిత అప్డేట్స్ మార్కెట్లను ప్రధానంగా ప్రభావితం చేయనున్నాయని నిపుణులు అంటున్నారు.
మార్చి నెలకు సంబంధించి పారిశ్రామికోత్పత్తి, ఏప్రిల్ ద్రవ్యోల్బణం గణాంకాలు ఈ వారంలోనే విడుదలయ్యే అవకాశమున్నట్లు జియోజిత్ ఫినాన్షియల్ సర్వీసెస్ పరిశోధనా విభాగాధిపతి వినోద్ నాయర్ తెలిపారు. ఈ గణాంకాలు మార్కెట్లకు కీలకం కానున్నట్లు పేర్కొన్నారు.
ఈ వారం స్టాక్ మార్కెట్లు నాలుగు రోజులే పని చేయనున్నాయి. 'ఈద్ ఉల్ ఫితర్' సందర్భంగా గురువారం మార్కెట్లకు సెలవు. మార్కెట్ల పని దినాలపైనా మదుపరులు దృష్టి సారించే అవకాశముందని చెబుతున్నారు స్టాక్ బ్రోకర్లు.
ఏప్రిల్లో స్టాక్ మార్కెట్ల నుంచి రూ.9,659 కోట్ల విదేశీ సంస్థ గత పెట్టుబడులు వెనక్కెళ్లాయి. మే మొదటి వారంలో ఏకంగా రూ.5,936 కోట్ల పెట్టుబడులను మార్కెట్ల నుంచి ఉపసంహరించుకున్నారు విదేశీ మదుపరులు. ఈ పరిస్థితి ఇలానే కొనసాగితే మార్కెట్లకు భారీ నష్టాలకు తప్పకపోవచ్చని విశ్లేషకులు చెబుతున్నారు.
వీటన్నింటితో పాటు వివిధ రాష్ట్రాల్లో విధించిన లాక్డౌన్లు, ముడి చమురు ధరలు, రూపాయి కదలికలు మార్కెట్లను ప్రభావితం చేసే సాధారణ అంశాలుగా ఉండనున్నాయి.
ఇదీ చదవండి:'స్టాక్స్'లో పెట్టుబడులకు ఇది సరైన సమయమేనా?
