ఎఫ్​డీ చేస్తున్నారా? ఈ విషయాలు తెలుసుకోండి..

రిస్కు లేని పెట్టుబడి అంటే వెంటనే గుర్తొచ్చేది ఫిక్స్​డ్​ డిపాజిట్(ఎఫ్​డీ). నిర్ధిష్ట కాలానికి కొంత మొత్తాన్ని బ్యాంకులు, ఆర్థిక సంస్థల్లో ఎఫ్​డీ చేయటం వల్ల సాధారణ పొదుపు ఖాతా కంటే ఎక్కువ వడ్డీ రేటును పొందవచ్చు. అయితే ఎఫ్​డీ చేసేందుకు ముందు అధిక వడ్డీ రేట్లను మాత్రమే చూడాలా? ఇంకా ఎలాంటి విషయాలు తెలుసుకున్నాక ఎఫ్​డీపై నిర్ణయం తీసుకోవాలి? అనే వివరాలు మీకోసం.

ఖచ్చితమైన రాబడిని ఇచ్చే పెట్టుబడి సాధనం ఫిక్స్​డ్​ డిపాజిట్(ఎఫ్​డీ). ఇందులో మదుపు చేసేందుకు కీలకమై అంశం వడ్డీ రేటు అనడంలో సందేహం లేదు. సాధారణంగా కో-ఆపరేటీవ్, స్మాల్ ఫినాన్స్ బ్యాంకులు ఎక్కువ వడ్డీ రేట్లను అందిస్తాయి. వాణిజ్య బ్యాంకులు వీటితో పోల్చితే కొంత తక్కువ వడ్డీ రేటును ఇస్తాయి. అయితే ఎఫ్​డీ విషయంలో వడ్డీ రేటు కీలమైనప్పటికీ ఇతర అంశాలను కూడా పరిగణనలోకి తీసుకోవాలంటున్నారు వ్యక్తిగత ఆర్థిక నిపుణులు.

భద్రత

ఫిక్స్​డ్​ డిపాజిట్​ను సురక్షితమైన పెట్టుబడిగా పరిగణిస్తారు. డిపాజిట్ ఇన్సూరెన్స్ అండ్ క్రెడిట్ గ్యారంటీ కార్పొరేషన్ ద్వారా బ్యాంకు డిపాజిట్​కు బీమా ఉంటుంది. వడ్డీ, అసలుకు కలిపి ఈ బీమాను రూ.5 లక్షలుగా నిర్ణయించింది ప్రభుత్వం. కొన్ని చిన్న తరహా బ్యాంకుల బీమా ప్రీమియంలు చెల్లించకపోవచ్చు. అందుకే డిపాజిట్ చేసే ముందే ఆ బ్యాంక్​కు బీమా ఉందా? లేదా? అనే విషయాన్ని తెలుసుకోవాలి. ప్రభుత్వ రంగ బ్యాంకులు, పెద్ద ప్రైవేటు బ్యాంకుల్లో డిపాజిట్లకు భద్రత ఎక్కువగా ఉంటుంది. షెడ్యూల్డ్ బ్యాంకులకూ ఈ బీమా వర్తిస్తుంది.

విశ్వసనీయత

ఫిక్స్​డ్​ డిపాజిట్లు సురక్షితమైనవని అనుకున్నప్పటికీ.. 100 శాతం రిస్కు లేదని కాదు. ఎన్​బీఎఫ్​సీ, కో-ఆపరేటివ్ బ్యాంకుల్లో ఇటీవల చూసిన సంక్షోభాన్ని దృష్టిలో ఉంచుకుని ఫిక్స్​డ్​ డిపాజిట్ చేసే ముందు కొంచెం జాగ్రత్తగా వ్యవహరించాలి. వాణిజ్య బ్యాంకుల్లో ఎఫ్​డీ తీసుకోవటం వల్ల బీమా ఉంటుంది. కో-ఆపరేటివ్ బ్యాంకులు ఎక్కువ వడ్డీ రేటును అందిస్తాయి. ఎన్​బీఎఫ్​సీల్లో ఫిక్స్​డ్​ డిపాజిట్ చేయాలనుకుంటే.. ఆ సంస్థ ఆర్థిక పరిస్థితి, క్రెడిట్ రేటింగ్ లాంటి విషయాల గురించి తెలుసుకోవాలి.

పన్ను

ఫిక్స్​డ్​ డిపాజిట్ చేసే ముందు పన్ను వివరాలను తప్పకుండా తెలుసుకోవాలి. పన్ను ప్రయోజనాలు కల్పించే 5 సంవత్సరాల ఎఫ్​డీని తీసుకోవటం గురించి ఆలోచించాలి. ఫిక్స్​డ్​ డిపాజిట్​పై వచ్చే వడ్డీపై ఆదాయ పన్ను చట్టం ప్రకారం శ్లాబుకు అనుగుణంగా పన్ను చెల్లించాల్సి ఉంటుంది. వార్షికంగా వడ్డీ ఆదాయం రూ.40వేల కంటే ఎక్కువ ఉంటే.. టీడీఎస్ ద్వారా పన్ను ఆటోమేటిక్​గా డిడక్ట్​ అవుతుంది. సీనియర్ సిటిజన్స్​కు అయితే ఈ పరిమితి రూ. 50వేలు. పన్ను శ్లాబులో లేనట్లయితే 15జీ, 15హెచ్ సమర్పించటం ద్వారా టీడీఎస్ నుంచి మినహాయింపు పొందొచ్చు.

ముందస్తు ఉపసంహరణ

కొన్ని బ్యాంకులు ఎఫ్​డీ ముందస్తు ఉపసంహరణకు భారీగా ఛార్జీలు వసూలు చేస్తాయి. అందుకే ఈ విషయాన్ని కూడా దృష్టిలో ఉంచుకుని ఎఫ్​డీలో మదుపు చేయాలని సలహా ఇస్తున్నారు నిపుణులు.

ఇదీ చదవండి: సీనియ‌ర్ సిటిజ‌న్స్‌ స్పెష‌ల్ ఎఫ్‌డీ స్కీమ్‌లు ఇవే..