ఆర్బీఐ ఇటీవలే విడుదల చేసిన వివరాల ప్రకారం.. గత ఐదేళ్లలో డిజిటల్ పేమెంట్స్ చేసిన వారి సంఖ్య భారీగా పెరిగింది. 2015-16 నుంచి 2019-20 మధ్య కాలంలో వార్షిక వృద్ధి రేటులో ఈ సంఖ్య 55.1 శాతంగా నమోదైంది. ఐదేళ్ల క్రితం 593.61 కోట్ల డిజిటల్ చెల్లింపులు చేయగా ఈ ఏడాది ఆ సంఖ్య 3,434 కోట్లకు ఎగబాకింది.
ఈ వ్యవధిలోనే డిజిటల్గా బదిలీ అయిన సొమ్ము వివరాలు చూస్తే.. ఐదేళ్ల క్రితం రూ. 920.38 లక్షల కోట్లు బదిలీ కాగా 2020లో ఆ విలువ రూ.1,623 లక్షల కోట్లకు పెరిగింది.
ఏడాదికి ఎంతెంత?
| సంవత్సరం | డిజిటల్ చెల్లింపుల సంఖ్య (కోట్లలో) | బదిలీ అయిన సొమ్ము(రూ. లక్ష కోట్లలో) |
| 2015-16 | 595.61 | 920.38 |
| 2016-17 | 969.12 | 1,120.99 |
| 2017-18 | 1,459 | 1,369.86 |
| 2018-19 | 2,343.40 | 1,638. 52 |
| 2019-20 | 3,434.56 | 1,623 |
ఈ ఏడాది బదిలీ అయిన సొమ్ము విలువ స్వల్పంగా తగ్గినా మొత్తంగా ఐదేళ్లలో చూస్తే ఈ విలువ చాలా మేరకు పెరిగిందని ఆర్బీఐ నివేదిక స్పష్టం చేస్తోంది.
ఆర్బీఐ పాత్ర కీలకం
కేంద్రం అమలు చేసిన నోట్ల మార్పిడి అనంతరం డిజిటల్ పేమెంట్స్ భారీగా పెరిగాయి. యూపీఐ పేమెంట్స్, యాప్ పేమెంట్స్ విధానాలు మరింత వెలుగులోకి వచ్చాయి. కానీ, ఈ విధమైన లావాదేవీలన్నింట్లో ఆర్బీఐ కీలక పాత్ర పోషించింది.
వినియోగదారుల్లో నమ్మకాన్ని పెంచడానికి ఆర్బీఐ కొన్ని నిబంధనలు తీసుకొచ్చింది. 2019 జనవరి నుంచి డిజిటల్ పేమెంట్ విధానంలో ఈఎమ్వీ చిప్ తప్పనిసరి చేయడం, పిన్ ఆధారిత డెబిట్ కార్డు, క్రెడిట్ కార్డులను అమలు చేయడం కీలక నిర్ణయాలుగా మారాయి. కాంటాక్ట్లెస్ కార్డుల విధానం కూడా ఇందులో ఒకటి.
ఇదీ చదవండి:ఈ సారైనా పరిహారానికి పరిష్కారం లభించేనా?
