SBI IMPS limit: ప్రభుత్వ రంగ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా (ఎస్‌బీఐ).. ఇమిడియెట్‌ పేమెంట్‌ సర్వీస్(ఐఎంపీఎస్) లావాదేవీ పరిమితిని రూ.5 లక్షలకు పెంచింది. ఆర్‌బీఐ మార్గదర్శకాల మేరకు ఈ నిర్ణయం తీసుకుంది. గతంలో గరిష్ఠంగా రూ.2 లక్షలుగా ఉన్న పరిమితిని రూ.5 లక్షలకు పెంచాలని బ్యాంకులకు ఆర్‌బీఐ గతేడాది అక్టోబర్‌లో సూచించింది. ఈ నేపథ్యంలో ఎస్‌బీఐ ఈ నిర్ణయం తీసుకుంది. రూ.2 లక్షల నుంచి రూ.5 లక్షల వరకు ప్రతి లావాదేవీకి రూ.20పైగా జీఎస్టీ చెల్లించాల్సి ఉంటుందని ఎస్‌బీఐ తెలిపింది.
రోజులో ఎప్పుడైనా నగదు పంపుకొనేందుకు ఐఎంపీఎస్ సాయపడుతుంది. ఆదివారాలు, సెలవు రోజుల్లో సైతం నగదు పంపుకొనే వెసులుబాటు ఉంది. ప్రస్తుతం వెయ్యి రూపాయల వరకు ఎలాంటి ఛార్జీలూ చెల్లించాల్సిన అవసరం లేదు. వెయ్యి నుంచి రూ.10 వేల వరకు రూ.2 పైగా జీఎస్టీ, రూ.10వేలు నుంచి రూ.లక్ష వరకు రూ.4పైగా జీఎస్టీ, రూ.1 లక్ష నుంచి రూ.2 లక్షల వరకు రూ.12పైగా జీఎస్టీ చెల్లించాల్సి ఉంటుంది. కొత్తగా రూ.2 లక్షల నుంచి రూ.5 లక్షల శ్లాబ్‌ను ఎస్‌బీఐ ఏర్పాటు చేసింది.
ఇదీ చూడండి: భారీ నియామకాలతో.. ఫ్రెషర్స్కు విప్రో శుభవార్త!
