ఇప్పటికే ప్రమాద హెచ్చరికలు జారీ చేసిన భారీ రుణ ఖాతాలను 'మోసపూరిత' ఖాతాలుగా బ్యాంకులు గుర్తించాలని రిజర్వ్ బ్యాంక్ ఆఫ్ ఇండియా (ఆర్బీఐ) ఆదేశించినట్లు తెలుస్తోంది. ఇందుకు డిసెంబరు 31ని గడువుగా పెట్టారని ఈ విషయాలతో సంబంధమున్న ఇద్దరు వ్యక్తులు తెలిపినట్లు వార్తా సంస్థ కోజెన్సిస్ వెల్లడించింది .
'హెచ్చరికలు జారీ చేసిన ఆయా ఖాతాల పరిస్థితిపై నివేదిక పంపడంతో పాటు, వాటిని సరిగ్గా వర్గీకరించడానికి ఆర్బీఐ ఈ గడువు నిర్ణయించింది . కొన్ని బ్యాంకుల్లో ముందస్తు హెచ్చరిక వ్యవస్థలు బలంగా లేకపోవడం వల్లే ఆర్బీఐ ఈ ఆదేశాలు జారీ చేసింది' అని బ్యాంకింగ్ అధికారి ఒకరు తెలిపారు . అటువంటి ఖాతాలను మోసపూరిత ఖాతాలుగా గుర్తించడం, లేదంటే క్రమబద్ధీకరించిన పక్షంలో ఖాతాను నవీకరించడం వంటి విషయాల్లో బ్యాంకులు వేగం కనబరచడం లేదని .. అందుకే ఆర్బీఐ ఈ అడుగులు వేస్తోందని విశ్వసనీయ వర్గాలు చెబుతున్నాయి . చాలా వరకు బ్యాంకులు కొన్ని ఖాతాలను 'మోసపూరితమైనవి'గా గుర్తించాయి . అయితే అన్ని బ్యాంకులూ ఈ విషయంలో ముందుకు రావాల్సి ఉందని ఆర్ బీఐ భావిస్తోందని ఆ వర్గాలు పేర్కొన్నాయి .
- మోసపూరిత విభాగ ఖాతాలకు నాలుగు త్రైమాసికాల్లో 100 శాతం కేటాయింపులు జరపాల్సి ఉంటుంది.
- నిరర్థక ఆస్తుల విషయంలో ఎనిమిది త్రైమా సికాల్లో 100 శాతం కేటాయింపులు జరపాల్సి ఉంటుంది.
ప్రమాద హెచ్చరికల జారీ ఎందుకంటే
చాలా వరకు బ్యాంకుల్లో అంతర్గతంగా నియంత్రిత వ్యవస్థలు సరిగ్గా పనిచేయడం లేదు . మోసాల విషయంలో మధ్య స్థాయి సిబ్బంది ప్రధాన కార్యాలయానికి సమాచారాన్ని చేరవేయడంలో ఆలస్యమవుతోంది . అలాగే బ్యాంకు నుంచి క్రెడిట్ బ్యూరోలకు, క్రెడిట్ రిజిస్ట్రీకి చేరవేయడమూ ఆలస్యమవుతోన్న నేపథ్యంలో... రుణ ఖాతాల గుర్తింపు , వర్గీకరణలో సమస్యలు వస్తున్నాయి .
మోసపూరిత ఖాతాల గుర్తింపులో ఆలస్యం అవుతోందని.. 2015 లో ఆర్బీఐ ఈ 'రెడ్ ఫ్లాగ్డ్ అకౌంట్స్'( ప్రమాద హెచ్చరికలు జారీ చేసిన ఖాతాలు ) నమూనాను తీసుకొచ్చింది. బకాయిల ఎగవేత లేదా కీలక వ్యక్తుల రాజీనామా వంటివి చోటు చేసుకున్నపుడు బ్యాంకులో ఏదో మోసం జరిగినట్లు గుర్తించి ఆర్బీఐ ఈ హెచ్చరికలు జారీ చేస్తుంది. అపుడు బ్యాంకులు పూర్తి స్థాయిలో దర్యాప్తు చేపట్టాల్సి ఉంటుంది . రూ .50 కోట్లకు పైగా రుణ ఖాతాల్లో మోసాలు జరిగినపుడు వాటిని కచ్చితంగా ఆర్ బీఐకి చెందిన 'సెంట్రల్ రిపాజిటరీ ఆఫ్ ఇన్మఫర్మేషన్ ఆన్ లార్జ్ క్రెడిట్స్'కు నివేదించాల్సి ఉంటుంది . అయినా కూడా అటువంటి మోసాల గుర్తింపులో ఆలస్యం జరుగుతూనే ఉంది .
ఇదీ చదవండి:'ఆ విమానాల్లో ఐసోలేషన్ జోన్ అక్కర్లేదు'
