triple talaq over phone : త్రిపుల్ తలాక్ బారిన పడే బాధితుల సంఖ్య నానాటికి పెరుగుతూనే ఉంది. ఝార్ఖండ్ ధన్బాద్కు చెందిన ఓ మహిళకు.. ఆమె భర్త ఫోన్లో తలాక్ చెప్పాడు. ఆస్తి కోసం ఆశపడి ఆమె భర్త రెండో పెళ్లికి సిద్ధమయ్యాడు. దీనికి భార్య ఒప్పుకోదని తెలిసి.. ఫోన్లోనే తలాక్ చెప్పాడు ఆ వ్యక్తి. అయితే, దీనిపై బాధితురాలు మూడు నెలలుగా న్యాయపోరాటం చేస్తోంది. తనకు ఎవరూ సహకరించడం లేదని వాపోయింది.
అసలేం జరిగింది: బాధితురాలి తండ్రి తెలిపిన వివరాల ప్రకారం.. ధన్బాద్ జిల్లా చస్నాలాకు చెందిన అదిఫా ఫాతిమాకు బంగాల్లోని పురూలియా జిల్లాకు చెందిన అయూబ్ ఖాన్తో 2016లో వివాహం జరిగింది. అతను బేకరీలో పని చేస్తుండేవాడని, వారికి ఇద్దరు పిల్లలు ఉన్నారని తెలిపారు. ఇప్పుడు అయూబ్ ఖాన్ రెండో వివాహానికి సిద్ధమయ్యాడని బాధితురాలి తండ్రి వివరించారు. ఆస్తికి ఆశపడే ఈ అన్యాయానికి పాల్పడ్డారని వాపోయారు.
ఈ నేపథ్యంలో, తనకు న్యాయం చేయాలని బాధితురాలు పోలీసులను ఆశ్రయించింది. అయితే, వారు తమకు ఎలాంటి సహాయం చేయడం లేదని కుటుంబ సభ్యులు చెబుతున్నారు. నిందితుడిపై ఎటువంటి చర్యలు తీసుకోవడం లేదని ఆరోపించారు. దీంతో నిరాశ చెందిన ఫాతిమా.. జిల్లా సీనియర్ ఎస్పీని ఆశ్రయించింది. ఆమె కంప్లైంట్ను ఆధారంగా తీసుకున్న ఎస్ఎస్పీ ఇరు వర్గాలకు నోటీసులు జారీ చేశారు. అయితే మహిళ భర్త తన స్టేట్మెంట్ ఇచ్చేందుకు స్టేషన్కు రాలేదని.. గడువు తేదీ ముగిశాక అతడిపై కేసు నమోదు చేసుకొని దర్యాప్తు ప్రారంభిస్తామని పోలీసులు తెలిపారు.
