రాజస్థాన్లో పెను ప్రమాదం తప్పింది. ఓ ఆస్పత్రి వెనుక ఉన్న ఆక్సిజన్ ప్లాంట్ పైపులైన్ను దొంగలు కట్ చేశారు. దీంతో ఆక్సిజన్ సరఫరా ఆగిపోయింది. వెంటనే వార్డులో ఉన్న 20 మంది నవజాత శిశువులకు సిలిండర్ల ద్వారా ఆక్సిజన్ను అందించారు ఆస్పత్రి సిబ్బంది. ఎవరికీ ప్రాణాపాయం లేకపోవడం వల్ల అంతా ఊపిరి పీల్చుకున్నారు.
ఇదీ జరిగింది.. అల్వార్ నగరంలోని గీతానంద్ శిశు ఆస్పత్రిలో ఎఫ్బీఎన్సీ వార్డులో 20 మంది నవజాత శిశువులు.. ఆక్సిజన్ సపోర్ట్ మీద ఉన్నారు. అయితే ఆదివారం రాత్రి.. ఆస్పత్రి వెనుక ఉన్న ఆక్సిజన్ ప్లాంట్ పైపులను దొంగలించేందుకు కొందరు గుర్తుతెలియని వ్యక్తులు యత్నించారు. అందులో భాగంగా ఆక్సిజన్ పైపులను కట్ చేశారు. దీంతో ఎఫ్బీఎన్సీ వార్డుకు ఆక్సిజన్ సరఫరా ఆగిపోవడం వల్ల ఆస్పత్రిలో కలకలం రేగింది. అది గమనించిన దొంగలు.. పరారయ్యారు. దొంగలను చూసిన ఆస్పత్రి గార్డు గట్టిగా అరిచాడు. చిన్నారుల కుటుంబసభ్యులు, స్థానికులు.. పరిగెత్తి దొంగలను పట్టుకుని పోలీసులకు అప్పగించారు.
వార్డులో ఉన్న చిన్నారులకు అత్యవసరంగా ఆక్సిజన్ అందించేందుకు ఆస్పత్రి సిబ్బంది చర్యలు తీసుకున్నారు. హాస్పిటల్ ఆవరణలో ఉన్న ఆక్సిజన్ నింపి ఉన్న సిలిండర్లను ఎఫ్బీఎస్సీ వార్డుకు తరలించారు. హుటాహుటిన నవజాత శిశువులకు ఆక్సిజన్ అందించారు. ఎవరికీ ప్రాణాపాయం లేకపోవడం వల్ల అంతా ఊపిరి పీల్చుకున్నారు. అయితే ఈ ఘటనపై ఆసుపత్రి సిబ్బంది.. అధికారులకు సమచారం అందించారు. దీంతో అధికారులు.. ఇంజినీర్లను పిలిపించి రాత్రికి రాత్రే పైపులైన్‌కు మరమ్మతులు చేయించారు. ఆక్సిజన్ సరఫరా సాఫీగా సాగేటట్లు చర్యలు చేపట్టారు.
అయితే ఈ ఆస్పత్రిలో గతంలో అనేక సార్లు దొంగతనాలు జరిగాయని సిబ్బంది తెలిపారు. విద్యుత్ వైర్లు, పైపులైన్లు, మోటర్లు, ఇతర వస్తువులను దొంగలు దోచుకెళ్లారని చెప్పారు. పోలీసులు మాత్రం పట్టించుకోవడంలేదని, ఎలాంటి చర్యలు తీసుకోవడం లేదని ఆరోపించారు. ఆదివారం రాత్రి జరిగిన ఘటనపై పోలీసులు విచారణ ప్రారంభించారు. ఇద్దరు దొంగలను స్టేషన్కు తరలించి విచారిస్తున్నారు. వారికి సహకరించిన వ్యక్తులను కూడా పట్టుకునేందుకు గాలింపు చర్యలు ప్రారంభించారు.
