School Girl Sets 100 World Records : రికార్డుల మీద రికార్డులు సొంతం చేసుకుంటోంది ఈ చిచ్చరపిడుగు. ఎన్నో ప్రపంచ రికార్డులు.. ఈ అమ్మాయి ప్రతిభ, నైపుణ్యాలకు దక్కిన ప్రతిఫలాలు. అంతేనా 14 ఏళ్లకే 3 డాక్టరేట్లు అందుకుని ఆశ్చర్య పరిచింది. సాధన చేస్తే.. సాధించలేనిదేదీ ఉండదంటూ యోగా, సామాజిక సేవలో తనదైన ప్రత్యేకత చాటుకుంటోందీ మల్టీ టాలెంటెడ్‌ కిడ్‌.
యోగాలో విన్యాసాలు చేస్తున్న ఈ అమ్మాయి పేరు ప్రిషా. స్వస్థలం తమిళనాడు. తండ్రి వ్యాపారవేత్త.. తల్లి లాయర్‌. తల్లి దేవి ప్రియ హాబీగా యోగా నేర్పించేవారు. ఆమెను చూస్తూ చిన్ననాడే యోగాపై ఆసక్తి పెంచుకుంది ప్రిషా. పాఠశాల విద్యలో రాణిస్తూనే పట్టుదలతో యోగా సాధన చేసింది. పుదుచ్చేరిలో యోగా ప్రొఫెసర్‌గా ఉన్న అమ్మమ్మ ప్రోత్సాహం కూడా తనకు ఉందని అంటోంది.
కళ్లకు గంతలతో సైకిల్‌ రైడింగ్
కుటుంబ సభ్యుల ప్రోత్సాహంతో కఠోర సాధన చేసింది ప్రిషా. నీటి అడుగున, నీటిపైనా చేసే యోగా, వినూత్నంగా ఈత కొట్టడం వంటి అబ్బురపరిచే విన్యాసాలు చేసింది. కళ్లకు గంతలతో సైకిల్‌ తొక్కడం, సైకిల్‌ తొక్కుతూనే హులాహుప్‌ చేయడం, కళ్లకు గంతలుండగానే తన ముందు ఏ వస్తువుందో ఇట్టే చెప్పేయడం చేస్తూ ఔరా అనిపించింది. స్కేటింగ్‌, 2 చేతులతో రాయడం, రూబిక్‌ క్యూబ్స్‌ సాల్వ్‌ చేయడంలో చిచ్చరపిడుగులా మారింది.
తొమ్మిదేళ్ల వయసులోనే డాక్టరేట్
ఎదగడమేకాదు తోటి వారికి చేయందించడంలోనూ ముందుంటోంది ప్రిషా. తనకు 8 ఏళ్లు ఉన్నప్పుడు అంధుల్ని చూసి చలించిపోయింది. తిరునల్వేలిలో వారికి యోగా శిక్షణ ఉచితంగా ఇవ్వడం మొదలుపెట్టింది. ఈ చిన్నారి సేవను చూసి 2019లో యూనివర్సిటీ ఆఫ్ జెరూసలేం మెడికల్‌ కాలేజీ అండ్‌ హాస్పిటల్స్‌, వేలూరు వారు డాక్టరేట్ అందించారు. అలా తొమ్మిదేళ్ల వయసులోనే డాక్టరేట్ పొందిన అమ్మాయిగా ప్రిషా రికార్డు సాధించింది.
"ఇంత చిన్నవయసులో నేను మాత్రమే ప్రపంచ యోగాలో 100కు పైగా అవార్డులు సాధించాను. ఇదేగాక కేంద్ర ప్రభుత్వం సర్టిఫికెట్ ఇవ్వడం వల్ల అంధ విద్యార్థులకు యోగాలో శిక్షణ ఇస్తున్నాను. 'యోగా ఇండ్రియా సీవమ్‌ ఇన్బుమ్‌ పెరువమ్‌' అనే పుస్తకాన్నీ రాశాను. నీటిపై అత్యధిక యోగాసనాలు వేసిన వారిలో నేనూ ఒకరిని. ప్రపంచంలో అతిపిన్నవయసులోనే యోగాలో 3 డాక్టరేట్లు అందుకున్నాను. 2 ఇండియా, 1 యుఎస్‌ నుంచి. గత 4ఏళ్లుగా అనేక స్కూళ్లు, కాలేజీలకు వెళ్లి ఉచితంగా యోగా నేర్పిస్తున్నాను. పోటీపరీక్షల కోసం చాలా మంది నా గురించి తెలుసుకున్నారు. నేను థాయ్‌లాండ్‌, మలేసియాల్లో జరిగిన ప్రపంచ యోగా పోటీల్లో భారత్‌ తరపున ఛాంపియన్‌గా నిలిచాను."
--ప్రిషా, యోగా సాధకురాలు
దివ్యాంగుల సేవకు మెచ్చిన జాతీయ బాలల హక్కుల కమిషన్‌ చిన్నవయసులో గురువుగా మారిన తొలి బాలికగా ప్రిషాను గుర్తించి ధ్రువీకరణ అందించింది. 2020-21 నేషనల్‌ యూత్‌ ఫెస్టివల్‌లో కేంద్ర ప్రభుత్వం నడిపే పాఠశాలల్లో యోగా పోటీలకు ముఖ్య అతిథి, జడ్జిగా అవకాశం కల్పించింది. గతేడాది ఆగస్టులో మలేషియన్‌ అసోసియేషన్‌ ఆఫ్‌బ్లైండ్‌ తనని ప్రత్యేకంగా తమ దేశానికి రమ్మని ఆహ్వానించింది.
యోగా ద్వారా సేవా కార్యక్రమాలు నిర్వహిస్తోంది ప్రిషా. తమిళనాడుతో పాటు పుదుచ్చేరి కేంద్రపాలిత ప్రాంతంలో వృద్ధాశ్రమాలు, పాఠశాలలు, కాలేజీల్లో ఉచిత శిక్షణలు ఇస్తోంది. పోలీసు అధికారులు, NCC విద్యార్థులకు గురువుగా కొనసాగుతోంది. యోగాతో సమాజంలో స్ఫూర్తి నింపుతూ, సేవా కార్యక్రమాలు నిర్వహిస్తున్న ప్రిషాకు 2021లో ఇండియన్‌ ఎంపైర్‌ యూనివర్సిటీ, అమెరికాలోని వరల్డ్ తమిళ్‌ యూనివర్సిటీ డాక్టరేట్లను ప్రదానం చేశాయి. అలా 3 డాక్టరేట్లు దక్కించుకుని.. ఈ ఘనత సాధించిన పిన్నవయస్కురాలిగా నిలిచింది.
"నేను ఎన్నో కేంద్ర ప్రభుత్వ కార్యక్రమాలకు అతిథిగా వెళ్లాను. మా అమ్మ, బామ్మల స్ఫూర్తితో చిన్నప్పటి నుంచే యోగాను అభ్యసించాను. వాళ్లను నిరంతరం గమనించటం వల్లే ఆసనాలపై ఆసక్తి కలిగింది. యోగా, ధ్యానంతో పాటు సైకిల్‌నూ నడుపుతుంటాను. నేను కళ్లకు గంతలు కట్టుకుని 2 చేతులతోనూ రాయగలను కూడా. ధ్యానం, యోగాపై ప్రపంచవ్యాప్తంగా మరింతమందికి అవగాహన కల్పించడమే నా లక్ష్యం."
--ప్రిషా, యోగా సాధకురాలు
యోగా పోటీల్లో 200కు పైగా బంగారు పతకాల్ని దక్కించుకుంది ప్రిషా. ఇలా తన ప్రతిభతో 100 రికార్డులు సాధించింది. అతిచిన్న వయసులో ప్రతిభతో ఇన్నేసి రికార్డులు సాధించడాన్ని గుర్తించి USAకి చెందిన గ్లోబల్‌ యూనివర్సిటీ ప్రత్యేకంగా మెచ్చుకుంది. లెట్స్‌ డూ ఇట్ టు డే ఎంజాయ్‌ ఇట్ పుస్తకాన్నీ రాసింది ప్రిషా. భవిష్యత్తులో గిన్నిస్ బుక్ ఆఫ్ వరల్డ్ రికార్డ్స్ లో స్థానం సాధించడమే లక్ష్యమని చెబుతోంది ఈ సూపర్ కిడ్‌.
- " class="align-text-top noRightClick twitterSection" data="">
పేక ముక్కలతో మ్యాజిక్! నిమిషంలో 18 కార్డులను పుచ్చకాయలో దించి రికార్డు.. 'గిన్నిస్' దాసోహం
