'మహారాష్ట్రలో వైరస్​ వ్యాప్తికి కేంద్రమే కారణం'

కరోనాను​ కట్టడి చేయటంలో మహారాష్ట్ర సర్కారు విఫలమైందని అంటే.. అది తొలుత కేంద్ర ప్రభుత్వ వైఫల్యమేనని శివసేన ఎంపీ సంజయ్​ రౌత్ వ్యాఖ్యానించారు. వైరస్ వ్యాప్తి మొదలైనప్పటి నుంచి కేంద్రం సూచనలను మహారాష్ట్ర ప్రభుత్వం పాటించిందని పేర్కొన్నారు. రాష్ట్రాలను నిందించటం కేంద్రం మానుకోవాలని హితవు పలికారు.

మహారాష్ట్ర, ఛత్తీస్​గఢ్​, పంజాబ్​లో కరోనా విజృంభణకు ప్రధాన కారణం కేంద్ర ప్రభుత్వ వైఫల్యమే అని శివసేన ఎంపీ సంజయ్​ రౌత్​ విమర్శించారు. మహమ్మారి వ్యాప్తి మొదలైనప్పటి నుంచి కేంద్రం సూచనలను మహరాష్ట్ర ప్రభుత్వం పాటించిందని తెలిపారు. ఆపై పరిస్థితికి తగ్గట్లుగా చర్యలు తీసుకుందని వివరించారు. వైరస్​ వ్యాప్తి విషయంలో రాష్ట్రాలను నిందించటం కేంద్రం మానుకోవాలని హితవు పలికారు.

"మహారాష్ట్రతో పాటు మిగతా రెండు రాష్ట్రాలు(ఛత్తీస్​గఢ్​, పంజాబ్​).. వైరస్​ను ఎదుర్కోవడంలో విఫలమయ్యాయని భావిస్తే.. ఆ ఓటమి తొలుత కేంద్రానిదే. ప్రధాన మంత్రి నరేంద్ర మోదీ నాయకత్వంలోనే మొదటి నుంచి కరోనా మహమ్మారిపై దేశం పోరాడుతోంది. భాజపా ముఖ్యమంత్రులు ఉన్న రాష్ట్రాల్లోంచి వైరస్​ అదృశ్యమైందా? వ్యాక్సిన్లను, రెమిడెసివర్​ను మహారాష్ట్రకు కేంద్రం సమకూర్చాలి. భాజపా అధికారంలో ఉన్న గుజరాత్​ వంటి రాష్ట్రాల్లో రెమిడెసివర్ ఔషధం దొరుకుతోంది. కానీ, మహారాష్ట్రలో మాత్రం అందుబాటులో లేదు."

- సంజయ్​ రౌత్​, శివసేన ఎంపీ

మహారాష్ట్ర భాజపా నేతలు రాష్ట్ర గౌరవాన్ని దెబ్బతీసేలా వ్యవహరిస్తున్నారని సంజయ్​ రౌత్ విమర్శించారు.

మరోవైపు.. మహారాష్ట్ర, ఉత్తర్​ప్రదేశ్​, దిల్లీ, ఛత్తీస్​గఢ్​, కర్ణాటక, కేరళ, తమిళనాడు, మధ్యప్రదేశ్, గుజరాత్​, రాజస్థాన్​ రాష్ట్రాల్లోనే అత్యధిక కరోనా కేసులు నమోదవుతున్నాయని కేంద్ర వైద్య ఆరోగ్య శాఖ తెలిపింది. మొత్తం కేసుల్లో 83.02 శాతం కేసులు ఈ 10 రాష్ట్రాల్లోనే ఉన్నాయని చెప్పింది.

ఇదీ చూడండి:వచ్చే ఐదు రోజులు వర్షాలే వర్షాలు!