జాతి పిత మహాత్మ గాంధీ ఏది చెప్పినా అది ఆచరణలో పెట్టేవారన్నారు కాంగ్రెస్ అగ్రనేత రాహుల్ గాంధీ. కేరళలోని సొంత నియోజకవర్గం వయనాడ్లో తొలి రోజు పర్యటనలో ఉన్న రాహుల్.. జాతి పిత విగ్రహాన్ని ఆవిష్కరించారు. ఈ సందర్భంగా బాపూజీ విగ్రహాన్ని చూసినప్పుడు ఆయన చేసిన మంచి పనులు, జీవనశైలి గుర్తుకు వస్తాయని చెప్పారు.
"భారత్.. మతసహనం పాటించాలని చెప్పారంటే.. గాంధీజీ కూడా సహనశీలిగా ఉండేవారు. మహిళలను గౌరవించాలని చెప్పారంటే.. తానూ పాటించేవారు. భారత్.. లౌకిక దేశంగా ఉండాలని అన్నారంటే తానూ అలాగే వ్యవహరించేవారు."
-రాహుల్ గాంధీ, కాంగ్రెస్ నేత
రెండు రోజుల వయనాడ్ పర్యటన కోసం ఉదయం కోజికోడ్ చేరుకున్న రాహుల్.. క్లాట్ ఉత్తీర్ణత సాధించిన గిరిజన విద్యార్థులతో మధ్యాహ్న భోజనం చేశారు. వారు దేశంలోని అత్యున్నత న్యాయస్థానాల్లో పనిచేయాలని ఆకాంక్షించారు. అనంతరం వయనాడ్లో ఎంపీల్యాడ్స్ నిధుల కింద ఓ తాగు నీటి ప్రాజెక్టును ప్రారంభించారు.
ఇదీ చూడండి: 'ఏడేళ్లుగా ప్రధాని మోదీది అదే ప్రసంగం'
