PHD in old age: ఉద్యోగ విరమణ తర్వాత.. ఎవరైనా విశ్రాంతి తీసుకునేందుకే మొగ్గు చూపుతారు. కానీ, తమిళనాడు, కన్యాకుమారి జిల్లాకు చెందిన 73 ఏళ్ల తంగప్పన్ అలా చేయలేదు. గాంధేయ భావజాలం, చరిత్రపై ఆసక్తితో పీహెచ్డీ పూర్తి చేయాలని సంకల్పించుకుని.. చేసి చూపించారు. తమిళనాడు గవర్నర్ ఎన్ రవి చేతుల మీదుగా బుధవారం పీహెచ్డీ పట్టా పొందారు.
కన్యాకుమారిలోని పుత్తూర్ గ్రామానికి చెందిని తంగప్పన్.. ఉపాధ్యాయుడిగా సేవలందించి 65 ఏళ్ల వయసులో ఉద్యోగ విరమణ చేశారు. గాంధేయవాది అయిన ఆయనకు మహాత్ముడి భావజాలం, చరిత్రపై ఆసక్తి ఎక్కువ. మనోన్మనియమ్ సుందర్నార్ విశ్వవిద్యాలయంలో చరిత్ర సబ్జెక్ట్లో పీహెచ్డీకి నమోదు చేసుకున్నారు.
2018లో పీహెచ్డీ పూర్తి చేశారు. ప్రస్తుతం హింసాత్మక ప్రపంచంలో గాంధీజీ ఆలోచనలు ఏవిధంగా ప్రభావం చూపుతాయనే అంశాలపై పరిశోధన చేశారు. అయితే, కరోనా మహమ్మారితో విధించిన లాక్డౌన్ కారణంగా విశ్వవిద్యాలయం స్నాతకోత్సవం వాయిదా పడుతూ వచ్చింది.
బుధవారం నిర్వహించిన స్నాతకోత్సవంలో గవర్నర్ చేతుల మీదుగా పీహెచ్డీ పట్టా అందుకున్నారు తంగప్పన్. 'సర్టిఫికెట్ కోసం నేను పీహెచ్డీ చేయలేదు. గాంధీజీ ఆలోచనలను నేను ఆరాధిస్తాను. భవిష్యత్తు తరాలకు గాంధిజమ్ గురించి తెలియాలి. దాంతో సమాజంలో శాంతి, ప్రేమానురాగాలు నిండి ఉగ్ర చర్యలు తొలగిపోతాయి' అని పేర్కొన్నారు తంగప్పన్.
ఇదీ చూడండి: Azadi ka Amrit Mahotsav: భారతీయులకు బిరుదులు ఎరగా వేసి..
