యువకుడ్ని కిడ్నాప్ చేసి, ఆమెతో బలవంతంగా పెళ్లి- పదేళ్ల తర్వాత అతడికి హైకోర్టులో న్యాయం!

Patna High Court Cancelled Forcible Marriage : యువకుడితో బలవంతంగా యువతి నుదిటిపై బొట్టు పెట్టించనంత మాత్రాన ఆ వివాహం చెల్లుబాటు కాదని పట్నా హైకోర్టు తెలిపింది. హిందూ సంప్రదాయం ప్రకారం సప్తపది చుట్టూ వధూవరులిద్దరూ తిరిగినప్పుడే చట్ట ప్రకారం వివాహం చెల్లుబాటు అవుతుందని పేర్కొంది. 10 ఏళ్ల కిందట బలవంతంగా జరిగిన ఓ వివాహంపై దాఖలైన పిటిషన్​పై విచారణ సందర్భంగా కోర్టు ఈ వ్యాఖ్యలు చేసింది.

Patna High Court Cancelled Forcible Marriage : యువకుడితో బలవంతంగా యువతి నుదిటిపై బొట్టు పెట్టించినంత మాత్రాన అది హిందూ సంప్రదాయం ప్రకారం చెల్లుబాటు అయ్యే వివాహం కాదని పట్నా హైకోర్టు స్పష్టం చేసింది. వధూవరులిద్దరూ స్వచ్ఛందంగా పవిత్రమైన 'సప్తపది' చుట్టూ ప్రదక్షిణ చేసినప్పుడు మాత్రమే విహహం చెల్లుబాటు అవుతుందని పేర్కొంది. 'హిందూ వివాహ చట్టంలోని నిబంధనలను పూర్తిగా పరిశీలిస్తే.. సప్తపది చుట్టూ వధువరులిద్దరూ ఏడడుగులు నడిచినప్పుడు మాత్రమే పెళ్లి పూర్తి అవుతుంది. అంతేగానీ సప్తపది పూర్తికాకపోయే.. ఆ వివాహం పరిగణనలోకి రాదు' అని హైకోర్టు స్పష్టం చేసింది. పదేళ్ల క్రితం ఓ యువకుడిని కిడ్నాప్ చేసి.. బలవంతంగా యువతి నుదిటిపై బొట్టు పెట్టించిన ఘటనపై విచారణ సందర్భంగా కోర్టు ఈ వ్యాఖ్యలు చేసింది. బలవంతంగా జరిగిన ఈ వివాహాన్ని రద్దు చేస్తూ తీర్పు ఇచ్చింది.

అసలేం జరిగిందంటే..
ఆర్మీలో సిగ్నల్​ మ్యాన్​గా పని చేసే రవికాంత్​ అనే యువకుడు.. 2013 జూన్ 30వ తేదీన లఖిసరాయ్​లోని 'అశోక్ ధామ్'​ దేవాలయానికి వెళ్లాడు. అప్పుడు అతడిని కొందరు వ్యక్తులు కిడ్నాప్ చేశారు. ఆ తర్వాత తుపాకీతో బెదిరించి.. ఓ యువతి నుదిటిపై బలవంతంగా సిందూరం బొట్టు పెట్టించారు. ఇక నుంచి యువతి భర్త రవికాంత్​నేనని వాదించారు. అప్పుడు బాధితుడు రవికాంత్​.. ఆ బలవంతపు పెళ్లిని రద్దు చేయాలని ఫ్యామిలీ కోర్టును ఆశ్రయించాడు. ఈ పిటిషన్​ను 2020 జనవరి 27న కోర్టు తిరస్కరించింది. ఆ తర్వాత పట్నా హైకోర్టు ఆశ్రయించాడు రవికాంత్​.

రవికాంత్ పిటిషన్​పై విచారణ జరిపిన పట్నా హైకోర్టు న్యాయమూర్తి జస్టిస్ బజ్నాత్రి కీలక తీర్పునిచ్చారు. బలవంతంగా చేసిన పెళ్లిపై దాఖలైన పిటిషన్​ను ఫ్యామిలీ కోర్టు కొట్టివేయడం లోపభూయిష్టంగా ఉందని అన్నారు. యువకుడిని బెదిరించి బలవంతంగా యువతితో వివాహం చేయించడం చట్టవిరుద్ధమని పేర్కొన్నారు. చట్ట ప్రకారం ఈ పెళ్లి.. చెల్లుబాటు కాదని తీర్పును ఇచ్చారు. దీంతో యువకుడికి భారీ ఊరట లభించింది.

అంతకుముందు.. పట్నా హైకోర్టులో విచారణ సందర్భంగా వధూవరులిద్దరూ 'సప్తపది' పూర్తి చేసినట్లు వధువు తరఫు న్యాయవాది నిరూపించలేకపోయారు. అంతేగాక వధువు తరఫున కోర్టులో సాక్ష్యం చెప్పిన పూజారికి 'సప్తపది' గురించి ఎటువంటి అవగాహన లేదని కోర్టు గుర్తించింది. వధువు, పూజారి కోర్టులో చెప్పిన పెళ్లి జరిగిన ప్రదేశం ఒకటి కాదని తేలింది. ఈ నేపథ్యంలో బలవంతంగా చేసిన పెళ్లి.. చట్టం దృష్టిలో చెల్లదని కోర్టు రద్దు చేసింది.