తాను చనిపోయినట్లుగా తప్పుడు ధ్రువపత్రాలు సృష్టించి.. రూ. కోటి బీమా పొందేందుకు యత్నించాడు ఓ ప్రబుద్ధుడు. దీనికి కుటుంబంతో పాటు ఓ వైద్యుడి సహకారం తోడైంది. చివరకు అసలు విషయం బయటపడగా... పోలీసులు నలుగురిని అరెస్ట్ చేశారు. ఈ ఘటన మధ్యప్రదేశ్లో జరిగింది.
ఏం జరిగిందంటే..?
మధ్యప్రదేశ్, దేవాస్కు చెందిన హనీఫ్(46).. 2019, సెప్టెంబర్లో ఓ కంపెనీ నుంచి రూ. కోటి బీమా కవర్ తీసుకున్నాడు. రెండు వాయిదాలు కట్టిన తర్వాత.. డాక్టర్. షకీర్ మన్సూరి అనే వైద్యుడి సాయంతో.. హనీఫ్ మృతిచెందినట్లుగా నకిలీ మరణపత్రాన్ని రూపొందించారు. హనీఫ్ మరణపత్రంతో అతని భార్య రెహానా, కుమారుడు ఇక్బాల్ రూ. కోటి బీమా క్లెయిమ్ చేసుకునేందుకు దరఖాస్తు పెట్టారు.
ఇదే వ్యవహారంపై అనుమానం వ్యక్తం చేసిన సదరు కంపెనీ.. దేవాస్ పోలీస్ స్టేషన్లో ఫిర్యాదు చేసింది. దీంతో రంగంలోకి దిగిన పోలీసులు.. ఈ ఘటనపై పూర్తిస్థాయిలో దర్యాప్తు చేపట్టారు. విచారణలో హనీఫ్ సజీవంగానే ఉన్నట్లు పోలీసులు తేల్చారు.
నవంబర్ 7న ఫోర్జరీ కేసులో భాగంగా.. హనీఫ్, అతని భార్య రెహానా, కుమారుడు ఇక్బాల్తోపాటు నకిలీ మరణ ధ్రువపత్రాన్ని సృష్టించిన వైద్యుడు షకీర్ మన్సూరిని అరెస్ట్ చేశారు పోలీసులు. డాక్టర్. షకీర్ వైద్యడిగ్రీపైనా విచారణ చేస్తున్నట్లు దేవాస్ స్టేషన్ ఇంఛార్జ్ ఉమ్రావ్ సింగ్ తెలిపారు.
ఇదీ చూడండి: వలంటీర్ అరాచకం- చోరీ ఆరోపణతో యువకుడిపై కిరాతకంగా దాడి
