మహారాష్ట్రలో కరోనా కేసులు రోజు రోజుకూ విపరీతంగా పెరిగిపోతున్న నేపథ్యంలో ఇవాళ రాత్రి 8:30 గంటలకు ప్రజలనుద్దేశించి ప్రసంగించనున్నారు ఆ రాష్ట్ర ముఖ్యమంత్రి ఉద్ధవ్ ఠాక్రే. మహారాష్ట్రలో రికార్డు స్థాయిలో కేసులు వెలుగుచూస్తున్న తరుణంలో సీఎం మళ్లీ లాక్డౌన్ ప్రటిస్తారా? అనే చర్చ జోరుగా సాగుతోంది. ఆర్థిక ప్రభావం లేకుండా లాకౌడౌన్ విధించే సాధ్యాసాధ్యాలు పరిశీలించాలని అధికారులను ఠాక్రే ఇప్పటికే ఆదేశించడం దీనికి బలం చేకూర్చుతోంది.
సీఎం ప్రసంగిస్తారనే విషయాన్ని ముంబయి మేయర్ కిశోరి పెడ్నేకర్ వెల్లడించారు. ప్రజల నిర్లక్ష్యం వల్లే కరోనా కేసులు పెరుగుతున్నాయని ఆమె అన్నారు. ఈ పరిస్థితి ఆందోళనకరమని, ఆస్పత్రుల్లో పడకల కొరత, వెంటిలేటర్ల కొరత మళ్లీ ఏర్పడే ప్రమాదం ఉందని హెచ్చరించారు.
పుణెలో షట్డౌన్..
కేసులు పెరుగుతున్నందున పుణెలో శనివారం నుంచి వారం రోజుల పాటు బార్లు, హోటళ్లు, రెస్టారెంట్లను మూసివేయనున్నట్లు అధికారులు వెల్లడించారు. హోం డెలివరీ మాత్రం కొనసాగించవచ్చన్నారు. అంత్యక్రియలు, వివాహ వేడుకలు మినహా మరే ఇతర ఫంక్షన్లకు అనుమతి లేదని చెప్పారు.
మధ్యప్రదేశ్లో పలు జిల్లాలు..
మధ్యప్రదేశ్లోనూ కరోనా ప్రభావం ఉన్న ప్రాంతాల్లో ప్రభుత్వం లాక్డౌన్ అమలు చేస్తోంది. ఛింద్వాడా జిల్లా, రత్లాం నగరాల్లో గురువారం రాత్రి నుంచి ఆంక్షలు అమల్లోకి వచ్చాయి. శుక్రవారం రాత్రి 10 గంటల నుంచి బైతూల్ జిల్లా, ఖర్గోన్లోని పలు ప్రాంతాల్లో లౌక్డౌన్ అమలు కానుంది. ఈ ప్రాంతాల్లో ఏప్రిల్ 5 ఉదయం 6గంటల వరకు ఆంక్షలు ఉంటాయి. ఈ జిల్లాలో కరోనా పరిస్థితిని సమీక్షించేందుకు ప్రత్యేక అధికారుల బృందాలు వెళ్లాయని మధ్యప్రదేశ్ సీఎం శివరాజ్ సింగ్ చౌహాన్ వెల్లడించారు. రాష్ట్రంలోని పలు ప్రాంతాల్లో ఆదివారం అమలు చేస్తున్న లాక్డౌన్ యథావిధిగా కొనసాగుతుందని స్పష్టం చేశారు.
ఛత్తీస్గఢ్లో..
ఛత్తీస్గఢ్ దుర్గ్ జిల్లాలోనూ ఏప్రిల్ 6నుంచి 14 వరకు పూర్తి లాక్డౌన్ విధిస్తున్నట్లు అధికారులు చెప్పారు. కరోనా కేసులు పెరిగిన దృష్ట్యా ఈ నిర్ణయం తీసుకున్నట్లు పేర్కొన్నారు.
