Villagers clash over Shivaji statue: మహారాష్ట్ర జల్నా జిల్లాలో రెండు వర్గాల మధ్య తీవ్ర వివాదం జరిగింది. ఛత్రపతి శివాజీ మహారాజ్ విగ్రహ తొలగింపు, గ్రామ పేరు మార్పు విషయంలో తలెత్తిన వివాదమే కారణమని పోలీసులు తెలిపారు. ఈ ఘటనలో పాల్గొన్న 300 మందికి పైగా కేసులు నమోదు చేసినట్లు పోలీసులు పేర్కొన్నారు. గ్రామంలో పరిస్థితి అదుపులోకి వచ్చిందని.. అదనపు బలగాలను మోహరించినట్లు ఎస్పీ హర్ష్ పొద్దర్ తెలిపారు. ఈ కేసుపై దర్యాప్తు కొనసాగుతుందని.. పలు సెక్షన్ల కింద కేసులు నమోదు చేసినట్లు ఆయన పేర్కొన్నారు.
ఇదీ జరిగింది: జల్నా సమీపంలోని ఓ గ్రామంలో ఉన్న పోరాటయోధుడు ఛత్రపతి శివాజీ మహారాజ్ విగ్రహాన్ని అధికారులు తొలగిస్తున్నారు. దీంతో పాటు గ్రామానికి మాజీ భాజపా నాయకుడు గోపీనాథ్ ముండే పేరును పెట్టింది. దీన్ని ఓ వర్గం అడ్డుకోవడం వల్ల తీవ్ర ఉద్రిక్త పరిస్థితులు నెలకొన్నాయి. ఇరు వర్గాల ప్రజలు ఒకరిపై ఒకరు రాళ్లు రువ్వుకున్నారు. ఘటనా స్థలికి వెళ్లిన పోలీసులపైకి రాళ్లతో దాడి చేశారు. ఈ దాడిలో 30 మంది పోలీసులకు స్వల్ప గాయాలుకాగా.. మూడు పోలీసు వాహనాలు ధ్వంసం అయ్యాయి. పరిస్థితి అదుపు తప్పడం వల్ల పోలీసులు టియర్ గ్యాస్ ప్రయోగించారు.
ఇదీ చదవండి: గొడ్డలితో నరికి మేనమామ హత్య... తలతో ఊరంతా తిరిగి..
