'ట్రాక్టర్​ ర్యాలీ నిర్వహణ రైతుల రాజ్యాంగ హక్కు'

దిల్లీలో ట్రాక్టర్​ ర్యాలీని శాంతియుతంగా నిర్వహించడం రైతుల రాజ్యాంగ హక్కని రైతు సంఘాల నేతలు స్పష్టం చేశారు. గణతంత్ర దినోత్సవ వేడుకలకు ఎలాంటి ఆటంకం కలగకుండా ర్యాలీ జరుపుతామని పేర్కొన్నారు.

రైతులు శాంతియుతంగా ట్రాక్టర్​ ర్యాలీ నిర్వహించుకోవడం రాజ్యాంగ హక్కని రైతు సంఘాల నేతలు అన్నారు. జనవరి 26న దిల్లీలో ర్యాలీకి అనుమతించే వ్యవహారాన్ని దిల్లీ పోలీసులకే సుప్రీంకోర్టు వదిలేసిన నేపథ్యంలో రైతు సంఘాలు ఈమేరకు స్పందించాయి.

దిల్లీలోని రాజ్​పథ్​లో ట్రాక్టర్​ ర్యాలీ నిర్వహించడం లేదు. కేవలం దిల్లీ సరిహద్దుల్లోని ఔటర్​ రింగ్​ రోడ్డు ప్రాంతంలో ర్యాలీ జరుపుతాం. గణతంత్ర దినోత్సవానికి ఇది ఎలాంటి ఆటంకం కలిగించదు. మా రాజ్యాంగ హక్కును వినియోగించుకుంటాం.

-పారామిత్​ సింగ్​, భారతీయ కిసాన్​ యూనియన్​ పంజాబ్​ జనరల్​ సెక్రటరీ

ట్రాక్టర్​ ర్యాలీకి దిల్లీ పోలీసులు అనుమతి ఇవ్వకపోతే రాజ్యాంగ హక్కును వినియోగించుకునే అధికారం రైతులకు ఉంది. శాంతి భద్రతల సమస్యలు వస్తాయని భావిస్తే.. మా ర్యాలీకి ఇంకో మార్గాన్ని సూచించాలి.

-జోగిందర్​ సింగ్​, ఏక్తా ఉగ్రహన్​ సంఘ అధ్యక్షుడు

ప్రభుత్వ కార్యక్రమాలు జరిగే ప్రదేశాలవైపు మేము వెళ్లబోము. మా ట్రాక్టర్లకు జాతీయ జెండాలను, మా రైతు సంఘాల జెండాలను మాత్రమే తగిలిస్తాం. ర్యాలీ అయిపోయిన వెంటనే తిరిగి మా నిరసన ప్రదేశానికి వస్తాం.

-లక్​భీర్​సింగ్​, ఆల్ ఇండియా కిసాన్​ సభ ఉపాధ్యక్షుడు

ఇదీ చదవండి:రైతుల ఐకాస​ నుంచి బీకేయూ నేత సస్పెన్షన్​