కరోనా వైరస్ దృష్ట్యా దేశవ్యాప్తంగా దాదాపు అన్ని న్యాయస్థానాలు వీడియో కాన్ఫరెన్స్ ద్వారా కేసుల విచారణ చేపట్టాయి. దిగువస్థాయి న్యాయస్థానాల్లో వర్చువల్ సౌకర్యాలను పెంచేందుకు గానూ.. 2,506 కోర్టులకు నిధులు విడుదల చేసింది కేంద్ర న్యాయశాఖ. ఆయా భవనాల్లో వీడియో కాన్ఫరెన్స్ క్యాబిన్లను ఏర్పాటుచేయాలని సూచిందింది.
వీడియో కాన్ఫరెన్స్ క్యాబిన్ల ఏర్పాటు కోసం గత సెప్టెంబర్లోనే సుమారు రూ.5.21కోట్ల నిధులను విడుదల చేశాయి సుప్రీంకోర్టు ఈ-కమిటీ, న్యాయశాఖలు. మలి విడతలో భాగంగా హార్డ్వేర్ పరికరాలు, మానిటర్స్, కేబుల్స్ వంటి వాటికి అక్టోబర్లో మరో రూ. 28.886 కోట్లు అందించాయి.
ఆన్లైన్వైపే మొగ్గు..
దేశవ్యాప్తంగా సబార్డినేట్ కోర్టులు సహా.. మొత్తం 3,288 న్యాయస్థాన భవనాలు ఉన్నాయి. వీటిలో 2,506 భవనాల్లో దృశ్యమాధ్యమ క్యాబిన్ల ఏర్పాటుకు నిధులు విడుదల చేస్తోంది ప్రభుత్వం. ఆన్లైన్ ద్వారా కేసుల విచారణకు ప్రాధాన్యం ఏర్పడిన వేళ.. హైకోర్టులు, జిల్లా న్యాయస్థానాల్లో అవసరమైన సౌకర్యాలను కల్పిస్తోంది.
దేశంలో లాక్డౌన్ విధించినప్పటి నుంచి అక్టోబర్ 28 నాటికి.. రాష్ట్ర, జిల్లా స్థాయి న్యాయస్థానాల్లో కలిపి మొత్తం 49.67లక్షలకు పైగా కేసుల్ని వర్చువల్ పద్ధతిలో విచారించినట్టు కేంద్ర న్యాయశాఖ పేర్కొంది.
ఇదీ చదవండి: కరోనా రూల్స్ బ్రేక్ చేస్తే వ్యాసం రాయాల్సిందే..
