ఐపీఎల్ పాసులు ఓ ప్రభుత్వ అధికారి ఉద్యోగానికి ఎసరు పెట్టాయి. ఇటీవల జరిగిన ఓ మ్యాచ్కు కాంప్లిమెంటరీ పాసులు ఇవ్వాలని దిల్లీ జిల్లా క్రికెట్ సంఘాన్ని (డీడీసీఏ) అభ్యర్థించటమే ఆయన చేసిన తప్పు. ఈ విషయం బయటకు రాగానే చర్యలు చేపట్టింది ప్రధాని నరేంద్రమోదీ నేతృత్వంలోని కేబినెట్ నియామకాల కమిటీ (ఏసీసీ).
1987 బ్యాచ్ ఇండియన్ రైల్వే సర్వీస్ అధికారి గోపాల్ కృష్ణ గుప్తా.. డిప్యుటేషన్పై పునరుత్పాదక వనరుల మంత్రిత్వ కార్యదర్శిగా నియమితులయ్యారు. మార్చ్లో జరిగిన ఓ మ్యాచ్కు కాంప్లిమెంటరీ పాసులు కావాలని డీడీసీఏ కార్యాలయాన్ని కోరారు. అయితే సరైన స్పందన రాలేదు.
డీడీసీఏ అధ్యక్షుడు రజత్ శర్మకు పరిస్థితిని వివరిస్తూ లేఖ రాశారు గోపాల్ కృష్ణ. ఇద్దరమూ సమాన స్థాయి అధికారులమనీ, పరస్పరం సహాయ సహకారాలు ఉండాలని ఆ లేఖలో సూచించారు గుప్తా. ఈ విషయం మీ కింది ఉద్యోగులకు అర్థమయ్యేలా చెప్పడంటూ హితవు పలికారు. ఈ లేఖ బయటకు లీకవగా... గుప్తాపై చర్యలు తీసుకుంది కేబినెట్ కమిటీ. డిప్యుటేషన్ గడువు ముగియకముందే సంయుక్త కార్యదర్శి హోదా నుంచి తొలగించి తిరిగి సొంత క్యాడర్ అయిన రైల్వేస్కు పంపింది.
ఇదీ చూడండి: తమిళనాడు నుంచి జపాన్కు 'నీటి' ఇంజిన్
