అసోంలో నిర్వహించిన జాతీయ పౌర జాబితా(ఎన్ఆర్సీ)కు సంబంధించిన సమాచారమంతా భద్రంగా ఉందని కేంద్రం ప్రకటించింది. ఇటీవల అధికారిక వెబ్సైట్ నుంచి ఎన్ఆర్సీ తుదిజాబితాను తొలగించారనే కథనాలు వెలువడ్డాయి... అయితే అలాంటిదేమీ లేదమి కేంద్ర హోంశాఖ స్పష్టం చేసింది. సాంకేతిక సమస్య తలెత్తడం వల్లే క్లౌడ్‌లో సమాచారం కనిపించలేదన్న హోంశాఖ అధికార ప్రతినిధి.. త్వరలోనే సమస్య పరిష్కారం అవుతుందని పేర్కొన్నారు.
డేటా కనిపించకపోవడం వాస్తవమే...
ఎన్ఆర్సీ అధికారిక వెబ్సైట్లో తుదిజాబితా కొద్దిరోజులుగా అందుబాటులో లేకపోవడంపై పేర్లు లేని వారు ఆందోళన చెందుతున్నారు. వెబ్సైట్ నుంచి జాబితా కనిపించకుండా పోయిన మాట వాస్తవమేనని.. అసోం ఎన్ఆర్సీ సమన్వయకర్త హితేశ్‌ దేవ్‌ శర్మ అంగీకరించారు. అయితే తుదిజాబితాలో మార్పులు చేస్తున్నారనే ఆరోపణలను ఆయన తోసిపుచ్చారు.
"క్లౌడ్‌లో సమాచారాన్ని పొందుపరిచే కాంట్రాక్టును విప్రో సంస్థకు ఇవ్వగా.. ఆ గడువు గతేడాది అక్టోబర్‌ 19తో ముగిసింది. ఇప్పటివరకూ రెన్యువల్‌ చేయలేదు. అందువల్లే.. డిసెంబర్‌ 15 తర్వాత సమాచారం ఆన్‌లైన్‌లో కనిపించలేదు."
-హితేశ్‌ శర్మ, అసోం ఎన్ఆర్సీ కోఆర్డినేటర్
త్వరలో విప్రోతో సమావేశమై చర్యలు తీసుకుంటామని చెప్పారు. రెండు, మూడు రోజుల్లో పరిస్థితిని చక్కదిద్దుతామని పేర్కొన్నారు.
ఇదీ చూడండి: నేడు ఆమ్ఆద్మీ శాసనసభా పక్షనేత ఎన్నిక
