ఆసియాలోనే అతిపెద్ద పండ్లు, పువ్వులు, కూరగాయల మార్కెట్గా పేరొందిన చెన్నైలోని కోయంబేడు మార్కెట్ తమిళనాడులో ప్రస్తుతం కొవిడ్-19కు కేంద్ర బిందువుగా మారింది. ఇప్పటికే ఆ రాష్ట్రంలో మొత్తం 6,009 కరోనా పాజిటివ్ కేసులు బయటపడగా.. అందులో ఈ మార్కెట్కు సంబంధించినవే 1,568. రాష్ట్రంలో చేపల వ్యాపారం నుంచి ఎన్నో సూపర్ మార్కెట్ల కార్యకలాపాలను నిలువరించగలిగినప్పటికీ.. కోయంబేడును మాత్రం మూసేందుకు సాహసం చేయలేక పోతున్నారు అధికారులు. ఒకవేళ ఈ మార్కెట్ను మూసివేస్తే.. పండ్లు, కూరగాయలు, పువ్వుల కొరత ఏర్పడే ప్రమాదముందని వెనకడుగేస్తున్నారు.
ఒకేసారి లక్ష మంది
తమిళనాడులో రోజువారీ ఎక్కువ టెస్టులు చేస్తుండటం కూడా కేసుల పెరుగుదలకు ఓ కారణం. ఏప్రిల్ 28న 41 ల్యాబొరేటరీల ద్వారా మొత్తం 7,093 మందికి పరీక్షలు చేయగా.. ఆ సంఖ్య మే7 నాటికి 14,195కు చేరింది.
ఆంధ్రప్రదేశ్ సహా ఇతర రాష్ట్రాల నుంచి కోయంబేడు మార్కెట్కు సరకులు సరఫరా అవుతుంటాయి. వీటికి చెన్నైతో పాటు తమిళనాడు ఉత్తర జిల్లాలైన విల్లుపురం, కళ్లకురిచి, కాంచీపురం, వెల్లూరు, తిరువల్లూరు, చెంగళ్పట్టులో మంచి గిరాకీ ఉంది. దేశవ్యాప్తంగా లాక్డౌన్ పొడిగిస్తున్నట్లు కేంద్రం ప్రకటించిన అనంతరం.. ఏప్రిల్ 25న కోయంబేడు మార్కెట్ దేశం మొత్తాన్ని ఆకర్షించింది. ఒకేసారి లక్ష మందికిపైగా నిత్యావసర సరకులు కొనేందుకు మార్కెట్కు తరలివచ్చారు. భౌతికదూరం నిబంధనలు పాటించకుండా.. పెద్ద ఎత్తున కూరగాయల కోసం ఎగబడ్డారు.
ఏప్రిల్ 28న తొలి కేసు
ఆ తర్వాత ఏప్రిల్ 28న కోయంబేడు మార్కెట్లో తొలి కరోనా పాజిటివ్ కేసు నమోదైంది. అక్కడి ఓ వర్తకుడికి కరోనా పాజిటివ్గా వచ్చినట్లు అధికారులు ప్రకటించారు. కాంటాక్ట్ ట్రేసింగ్ ద్వారా మిగతా వారికి పరీక్షలు నిర్వహించారు. ఇప్పటి వరకు ఈ మార్కెట్తో సంబంధమున్న 6,984 మందికి టెస్టులు నిర్వహించారు. వీరిలో ఆరియలూరు జిల్లా నుంచి అత్యధికంగా 2,615 మంది ఉండగా.. కుడ్డలూరు-1,915, విల్లుపురం-891, పేరంబూర్-613, చెన్నై-446, కాంచీపురం జిల్లా నుంచి 124 మంది ఉన్నారు.
మార్కెట్ కారణంగా రెడ్ జోన్లోకి జిల్లాలు..
మే 1 నుంచి తమిళనాడులో కరోనా పాజిటివ్ కేసుల సంఖ్య విపరీతంగా పెరుగుతోంది. ఇందులో కోయంబేడు మార్కెట్ బాధితులే ఎక్కువమంది ఉన్నారు. ఎన్నో రోజులుగా ఆరెంజ్ జోన్లో ఉన్న అరియలూరు.. మార్కెట్తో సంబంధమున్న 246 మందికి కొవిడ్-19 పాజిటివ్గా వచ్చినందున.. ఒక్కసారిగా రెడ్ జోన్గా మారింది. మిగతా జిల్లాల్లోనూ ఇదే పరిస్థితి.
భవిష్యత్లో తగ్గుముఖం
అయితే రానున్న రోజుల్లో కేసుల సంఖ్యను తగ్గించగలమని అధికారులు ధీమా వ్యక్తం చేస్తున్నారు. కాంటాక్ట్ ట్రేసింగ్ ద్వారా మార్కెట్తో సంబంధమున్న వారందరినీ గుర్తించామని.. భవిష్యత్లో రాష్ట్రంలో కేసులు తగ్గుతాయని చెబుతున్నారు.
ఇదీ చూడండి : రోజూ 'గ్రీన్ టీ' తాగితే బరువు తగ్గుతారా?
